Kòrsou a gana e edishon dje aña aki dje Weganan Interinsular Eskolar, konosí tambe komo e Weganan ABC. Klousura dje evento deportivo akí a tuma lugá den wikènt na Boneiru ku kompetensianan den e ramonan di deporte trefbal, 3×3 basketbòl i tambe atletismo.
E Weganan Interinsular Eskolar ta destiná pa muchanan di skol for di Aruba, Boneiru i Kòrsou (ABC). Pa promé biaha, tabatin tambe un kompetensia na Kralendijk ku basketbolistanan di skolnan di Saba, Sint Eustatius i Sint Maarten.
E tim di basketbòl di Kolegio Alejandro Paula (KAP) di Kòrsou a termina na lugá di tres den e kompetensia di 3×3 basketbòl. E tim aki tambe a gana e premio pa e tim mas disipliná.
Mas aleu e tim di Sint Joris College di Kòrsou a hunga hopi bon den e kompetensia di trefbal. E tim akí a sali kampion despues di un kompetensia emoshonante.
Ademàs, e skolanten di Kòrsou tabata tambe den bon forma durante e kompetensianan di atletismo. Den e kategorianan di edat 10-11 i 12-13 e atletanan a gana oro den e kompetensianan di meerkamp i karedanan di estafèt.
E bon resultadonan ei na Boneiru, a pone ku e selekshon eskolar di Kòrsou a sigurá e viktoria total birando ganadó ‘overall’.
E Weganan Interinsular Eskolar a kuminsá na Kòrsou (13-16 di mart), a sigui na Aruba entre 27 i 30 di mart i a finalisá pues e wikènt tras di lomba na Boneiru. E deportistanan di Kòrsou a kompetí bou di supervishon di Fundashon Desaroyo Deportivo Kòrsou (FDDK) den e Weganan Interinsular.
FDDK, Instituto Biba Saludabel i Activo (IBiSA, Aruba) i Instituto di Deporte Boneriano (Indebon, Boneiru) a uní forsa pa organisá e weganan eskolar estilo nobo. Esaki tabata ku despues di un periodo ku no tabatin e enkuentronan deportivo akí.
Na komienso dje weganan na Kòrsou den mart, tabatin un torneo di fútbol pa mucha muhé di skolnan di enseñansa sekundario (vo) di Aruba, Boneiru i Kòrsou. Tabata tin tambe un kompetensia di agedres pa mucha homber i mucha muhé di enseñansa di fundeshi (fo) i tambe vo. Finalmente tabatin un torneo di natashon tambe pa mucha homber i muhé di tantu fo komo vo.
Na Aruba e muchanan di skol a kompetí kontra di otro den e ramonan di dporte vòlibòl (fo), basketbòl (fo) i dam (fo i vo). Na Boneiru pues e Weganan ABC a klousurá ku atletismo (fo i vo), trefbal (fo) i 3×3 basketbòl (vo).
