Kenley Jansen a logra djasabra tras di lomba su kuater wega salbá di e temporada nobo den Major League Baseball (MLB). Houston Astros tampoko no a logra skor kareda kontra e picher yu di Kòrsou, pa asina yuda su tim Los Angeles Angels gana 4 pa 1.
Ta di seis biaha ku Kenley Jansen ta mira akshon riba montíkulo pa su tim nobo Los Angeles Angels den e kampionato yòn den Liga Grandi. Un hit só Jansen a haña kontra djasabra, pero e batiadó aki no a logra skor pa Houston Astros.
Ku su di kuater wega salbá, Jansen ta keda ku posibilidat pa yega 478 ‘save’ e aña aki, pa asina yega mes tantu wega salbá ku e eks picher Lee Smith. Esaki ta okupá aktualmente e di très posishon riba e lista di relevistanan. Jansen su total aktual ta 451 ‘save’.
Si Jansen keda den bon salú i no sufri ningun leshon, e tin un chens real di empatá i asta tambe pasa Smith riba e lista. Den su karrera di diesiséis aña den MLB, e yu di Kòrsou a logra mas ku 30 wega salbá den ocho temporada, inkluyendo kuater biaha mas ku 40 ‘saves’. Den 2014 ela logra 44 ‘save’, 36 den 2015, 47 den 2016, 41 den 2017, 38 den 2018, 33 den 2019, 38 den 2021 i 41 ‘save’ den 2022.