RBC Royal Bank N.V., mihó konosí den pueblo komo RBC, ta patrosiná e organisashon di Curaçao Little League (CLL) pa di 25 aña konsekutivo. Esaki ta motibu pa selebrá i p’esei e banko ta emití monedanan spesial.
Porsierto ku gerensia di RBC a firma djaluna último, esta riba 14 di aprel, e di 25 kontrato di patrosinio ku CLL. Managing director di RBC Pierrot Hurtado a firmá e kontrato ku presidente Lucas Beaujon di CLL Foundation i tambe district administrator di Little League Urny Floran.
Den kuadro ku RBC pa 25 aña tras di otro ta patrosinadó prinsipal di CLL, e banko a laga imprentá monedanan spesial pa selebrá esaki. Riba e monedanan ta rekordá e selekshonnan di Kòrsou komo kampionnan mundial i tambe e títulonan lográ den e pulnan internashonal.
Pierrot Hurtado komo managing director di RBC a deklará e sigiuente: “Nos ta sumamente orguyoso pa por selebrá 25 aña di nos kompromiso i kontribushon na Fundashon Beisbòl Little League. Asina ku nos ta duna sosten tambe na e desaroyo di nos hóbennan, pa medio di e maraviyoso deporte di beisbòl. Little League ta un tremendo programa i RBC ta komprometé na dje pa 25 aña konsekutivo. Asina nos ta trese nos propósito pa ‘yuda klientenan prosperá i komunidatnan prosperá’ aún mas na bida.”
Mas aleu Hurtado a siguí splika ku RBC su foko ta riba e generashon di futuro pa asina yuda kreá lidernan pa un Karibe mas fuerte. “Nos sa ku partisipá den deporte por yuda hubentut desaroyá disiplina i karakter, ademas tin benefisionan di salú físiko i mental. E apoyo na Little League ta yuda hóbennan desaroyá e abilidatnan nesesario pa prosperá den nan trayektonan di karera aktual i futuro.”
RBC ta sòru pa e parti di materialnan, unifòrm, gran parti di e biahenan regional kubrí. Huntu ku e spònser di unifòrm, RBC Royal Bank ta spònser unifòrm pa umpire i skorernan, kurso pa umpire i skorer, kurso práktiko i atministrativo pa dirigentenan tékniko i atministrativo. “RBC ta hopi kontentu ku e ‘feedback’ ku nos ta risibí di e dirigente- i hungadó-, fanátiko i mayornan ku ta masha agradesido pa e patrosinio di RBC”, Pierrot Hurtado a tèrminá bisando.
District administrator Urny Floran di su banda a deklará esaki: “Durante e 25 añanan aki, Curaçao Little League a bira mas fuerte. Nos a logra manda nos hóbennan riba e tarima internashonal di mas haltu, nos a eksperensia hopi momentu di alegria i di orguyo, nos a konstruí un organisashon kaminda hóbennan por desaroyá di un forma sano i floresé den bida. Tur esaki no tabata posibel sin e sponsorship di RBC.”
