E maneho di Colorado Rockies un dia promé ku Bièrnè Santu, esta riba djaweps 17 di aprel, a retirá Hensley ‘Bam Bam’ Meulens. E motibu dje retiro akí ta pasobra e tim no ta produsiendo na bate.
Hensley Meulens ku tin 57 aña di edat tabata den su di tres aña komo coach di bateo di Colorado Rockies. E tim tabatin un mal temporada den bateo den 2024 kaba, i esaki no a bira mihó tampoko e aña akí.
Aña pasá Colorado Rockies tabatin komo tim un promedio di bateo di .242 punto. Esaki ta e promedio di bateo mas pihó den e historia dje tim ku ta hunga den Major League Baseball (MLB). Djaweps ora ku informá Hensleu Meulens di su retiro, e tim tabatin un promedio di bateo pober di .220 punto.
Di e 18 weganan ku Colorado Rockies a hunga te ku djaweps siman pasá, e tim a gana solamente tres. Despues dje retiro di Hensley Meulens e tim te ku djadumingu, esta Pasku di Resurekshon, a gana un wega i pèrdè dos pa un total di 4 viktoria i 17 derota te diadumingu pues. E tim ta okupá e último posishon den divishon West di Liga Nashonal.
Hensley Meulens for di aña pasá tabatin ku traha ku batiadónan hóben, pero e no a logra hasi nan hungadónan produktivo na bate. Pa motibu akí e maneho di Colorado Rockies a disidí pa yama e coach yu di Kòrsou danki pa su servisionan i a remplas’é ku èks-manager Clint Hurdle.
E direkshon di Colorado Rockies a duna di konosé públikamente di tin hopi apresio pa Hensley Meulens i tambe di ta rekonosé su gran reputashon i kontribushon den MLB, pero ku e maneho dje organisashon ta kere ku ta mihó pa adaptá i purba bini ku un aserkamentu nobo den entrenamentu di bateo.
Hensley ‘Bam Bam’Meulens a komensá su karrera komo coach den beisbòl profeshonal Merikano na aña 2010. Ku San Francisco Giants e yu di Kòrsou komo coach di bateo a gana World Series na 2010, 2012 i 2014, pues e tin tres renchi di kampion di MLB. Mas aleu ela fungí komo ‘bench coach’ (asistente prinsipal di e manager) di New York Mets i tambe komo asistent-coach di bateo di New York Yankees.
Promé ku Hensley Meulens a bira coach di bateo, ela hunga tambe den e MLB. Ela debutá na 1989 ku New York Yankees. Después ela hunga pa Montreal Expos i Arizona Diamondbacks. Na total e yu di Kòrsou a hunga 182 partido den e liga profeshonal Merikano. Después di esaki, e a bai hunga den e liga profeshonal di Mexico pa Saraperos i den e liga profeshonal di Hapon pa e timnan Chiba Lotte Marines i Yakult Swallows.