E selekshonnan di Liga Pabou a kuminsá e asina yamá District Series dje organisashon Curaçao Little League (CLL) ganando ayera djamars 22 di aprel. Liga Pabou den Minor League a gana 5 pa 4 di Liga Pariba, miéntras ku den Intermediate League e tim di Liga Pabou a superá Liga Pariba ku skor di 4 pa 0.
E weganan di Distrito den Minor, Little i Intermediate League ta tuma lugá den Post 6 Ballpark na Rio Canario.
Den e seri di Distrito ta uza e formato di ‘best of 5’. Esaki ta nifiká ku e selekshon ku gana tres wega den kada liga, ta bai representá Kòrsou den e kompetensianan regional. Den siman tin dos wega: 5’or di atardi i 7’or di anochi. Djasabra tin kuater wega planiá: dos mainta pa 9’or i 11’or, i dos atardi 2’or i 5’or. Djadumingu tin tres wega: 9’or, 11’or i 2’ori. E weganan den wikènt ta den kaso ku niun selekshon a gana tres enkuentro.
Liga Pariba den e proimé wega di Minor ayera a sali skor 1 kareda den promé inen, pero Liga Pabou den serada dje di dos inen a empatá e wega: 1-1. Pariba den kabes dje di tres inen a bolbe bai dilanti: 3-1.
Despues e dos selekshonnan no a skor ku no tabata te den di bòm dje di sinku inen, kaminda Pabou ku 2 kareda a empatá e wega: 3-3. Tur dos tim a skor 1 kareda den nan su di seis turno na bate: 4-4. Finalmente Liga Pabou a skor den di shete i último inen e kareda di gana i laga Pariba den tereno: 5-4.
Den e promé wega den Intermediate League e promé tres inennan e timnan no a skor kareda. Liga Pabou den su di kuater turno na bate a pika 1-0 dilanti. E selekshon den di seis inen a añadí 2 kareda mas: 3-0. Finalmente den su di shete i último turno na bate Pabou a bolbe skor 1 kareda i gana pues 4 pa 0 di Pariba.
E seri di Distrito di CLL a sigui awe djarason 23 di aprel ku e di dos wega den Minor i Intermediate, miéntras ku mañan djaweps 24 di aprel ta hunga e di tres wega den Intermediate i e promé enkuentro den Little League.
Fotógrafo: Jacinto de Jesus
