E selekshon di Liga Pabou a gana ayera djaweps 24 di aprel e promé wega den e asina yamá District Series den Little League. E tim a superá Liga Pabou ku skor di 6 pa 4 pa asina pika dilanti 1-0 den e seri di mihó di 5 wega. E 10 karedanan akí a kai den di sinku inen dje enkuentro.
E organisashon Curaçao Little League ta organisá aktualmente e Serinan di Distrito den Minor, Intermediate i Little League. Esakinan ta tuma lugá den Post 6 Ballpark na Rio Canario.
E serinan a kuminsá den Minor i Intermediate League, miéntras ku ayera djaweps a ranka sali den Little League. Liga Pabou tabata e tim bishitante i Pariba esun di kas. E timnan durante kuater inen no a skor kontra di otro, pa despues tur dos eksplotá ku respektivamente 6 i 4 kareda den nan di sinku turno na bate. Niun di dos no a skor den di seis inen i asina Pabou a registrá su promé viktoria.
Picher Janderick Martina a kleim e triunfo pa Liga Pabou. Durante 4,1 inen ela pèrmití 4 kareda riba 3 hit, miéntras ku ela ponchá 8 batiadó. Raygen Raphaela a bin na su lugá den di sinku inen i a pèrmití 1 hit i duna un base por bola. Mesora manager di Pabou a kambia Raphaela ku L’Viandro Petronilia ku den 1,2 inen a duna 1 base por bola i a ponchá 3 batiadó.
Na bate a sobresalí kècher Rashedean Ellis. Ela bati di seis den e alineashon di Pabou i a kaba e wega ku 2 hit den 2 turno. Ellis a skor 1 kareda i tabatin tambe 1 kareda empuhá.
Picher Marvidion Trinidad ku tambe a tira bon wega, a pèrdè esaki. Ela pèrmití 3 kareda den 4,1 inen i a ponchá 6 batiadó. Juriensly de Windt ku a drenta na su lugá a pèrmití 2 kareda mas sin por a saka out i tabatin ku traha lugá pa Marvion Trinidad ku na su turno a pèrmití e di 6 kareda di Liga Pabou, pero a ponchá 3 batiadó.
E Seri di Distrito den Little League entre Liga Pabou i Pariba ta sigui awenochi 7or den Post 6 Ballpark na Rio Canario. Pa 5or tin e di tres wega den Minor League entre Liga Pabou i Pariba. Pabou ta 2-0 dilanti den e seri akí i sí e selekshon gana awe tambe e ta haña e derechi pa representá Kòrsou den e kampionato regional di Minor.
Den Intermediate League Liga Pabou ta dilanti 2-1, despues di a logra ayera djaweps un viktoria di 3 pa 2 riba Pariba. E tim a skor 2 kareda den promé inen pa pika dilanti, pero Pariba a logra empatá e wega na 2 kareda den su di tres turno na bate. Pero den e di kuater inen Pabou a bolbe bai dilanti ora ela skor su di 3 kareda. E timnan no a skor den nan di sinku turno i e wega a kaba 3 pa 2 na fabor di Liga Pabou.
Sport.cw ta lamentá e echo ku ayera no a laga fotógrafo Jacinto de Jesus stashoná su outo paden riba parkeo di Post 6 Ballpark. E ta saka foto di tur aktividat deportivo i tambe sosial ku e ta publiká riba su pagina di Facebook i tambe ta kompartí su produkshonnan gratis ku su siguidónan i vários medionan di prensa, entre otro Sport.cw mes.
Ta di spera ku organisashon di Curaçao Little League por reglá un pas di outo pa Jacinto de Jesus pa e sobrá dianan ku tin wega i tambe pa e Serinan di Distrito di Junior i Senior League ku ta kuminsá djis aki den Tio Daou Ballpar