Glenka Antonia a sali deportista di aña 2018 di Kòrsou. E atleta femenino asina a gana e prestigioso Kopa Beto Adriana. E mes sinembargo no tabat’ei presente ayera, djasabra 23 di febrüari 2019, durante e tradishonal anochi di gala di Federashon Deportivo I Olimpiko Kòrsou (FDOK).
Manera tur aña ta e kaso, FDOK a premiá e mihó deportistanan di Kòrsou i tambe dirigente i arbitro di aña 2018. E evento a tuma lugá atrobe den Marjorie Party Palace.
Periodista deportivo Alexander Makaya di TeleCuraçao a fungi komo maestro di seremonia. Obispo Luis Secco tabata enkargá ku invokashon di e anochi, miéntras ku e artista Amadeus ‘Boy’ Thodé a kanta himno di Kòrsou i tambe duna un show despues.
E anochi di gala i premiashon di FDOK tabata un dedikashon na e siguente baluartenan: defuntu Leon Kelly, Enith Macleod-Koster, Gilbert Doran, Eva Tujeehut-Suriel i Ronald Martis.
Deportista hubenil femenino a sali Vanessa Mercera di atletismo. E otro nominadonan den e kategoria aki tabata Amy Perret dje ramo di deporte di kabai paso fino i sòfbolista Darlysse Salesia.
Darius Berenos di deporte di bela a sali deportista hubenil maskulino. E otro nominadonan tabata Jordano Hugo dje deporte di kabai paso fino, Dayveno Daal di altetismo i Goshue Keep di siklismo.
E mihó deportista senior femenino tabata Glenka Antonia di atletismo. E otro nominadonan den e kategoria aki tabata Richelle van Gennip dje deporte di sòfbòl i e siklista Lisa Groothuesheidkamp.
Jaden Bernabela di atletismo a sali deportista senior maskulino 2018. E otro nominadonan tabata e yudoka Yvanleah Maria i Hillard Cijntje dje ramo di deporte siklismo.
E komishon di elekshon presidí pa Aichel Richardson a skohe entre e kuater deportistanan ei, e mihó di 2018. Esaki a resultá Glenka Antonia ku asina a gana e prestigioso Kopa Beto Adriana.
