Kaya 6 ta priminti di bira un seri duru entre e mihó seis timnan di futbòl den Liga MCB. Ela kuminsá ku loke fanatikonan ke mira: hopi gol. Un total di nuebe gol a kai den e promé tres weganan. E seri ta sigui djabièrnè awor ku Jong Holland kontra di Sport Vereniging Vriendschap Eendracht Sterken Tegen Alles (SV Vesta).
E seis klupnan ku a klasifiká pa Kaya 6 despues dje bueltanan preliminar ta: Jong Holland, Skèrpènè, Centro Social Deportivo Barber, Inter Willemstad, SV Vesta i Union Deportivo Báandabou (Undeba).
Den e kompetensia regular kada tim a hunga un total di 18 wega. Esakinan a tuma lugá den Stadion Ergilio Hato na Brievengat i tambe Stadion Dr Antoine Maduro na Kintjan. E kampionato a para algun siman pa motibu dje pandemia di Covid-19.
Jong Holland ku a kaba na kabes dje bueltanan preliminar ku 42 punto, a kuminsá Kaya 6 ku un triunfo di 3-0 riba Undeba, ku a klasifiká na di seis lugá ku 27 punto. E golnan trikolor tabata di Dwaylon Maria na di 15 minüt, Kentz Suly na di 18 minüt i Jurensley Martina na di 49 minüt.
Skèrpènè ku a terminá na di dos puesto den kampionato regular ku 34 punto, a sali riba mal pia den Kaya 6. E tim di fraternan a pèrdè ku skor di 3-1 di SV Vesta ku a kaba e bueltanan preliminar na di kuater puesto ku 30 punto.
Mirco Colina a pone Vesta na di 12 minüt dilanti. Ruchendro Kiriendongo a skor na di 25 minüt via di pinalti i despues na di 85 minüt pa amplia e skor na 3-0. E gol di honor pa Skèrpène tabata di Merwin Bautisma ku a skor den minütnan final dje wega.
Inter Willemstad tambe a kuminsá Kaya 6 riba bon pia, derotando Centro Barber ku skor di 2-0. Tabata dos gol di Rudrick Pop. E promé tabata na di 56 minüt i e di dos na di 90+ minüt. Inter Willemstad a tèrminá e bueltanan preliminar empatá na di kuater lugá ku SV Vesta ku 30 punto, miéntras ku Centro Barber a kaba ku 32 punto na di tres puesto.
E kompetensia den Kaya 6 ta sigui pues djabièrnè awor ku Jong Holland kontra di SV Vesta. Tur dos tim tin 3 punto. E wega aki ta kuminsá 8or di anochi den Stadion Dr Antoine Maduro na Kinchan.
