E tim femenino di Hurricane a sali gana kuater wega riba e promé fecha dje kampionato hubenil di vòlibòl di Kòrsou. Stakamahakchi tambe por mira atras riba un bon apertura ku tres viktoria i un derota.
E kompetensia hubenil ta pa volibolistanan di 14 aña i mas hoben, esta U14. E weganan ta tuma lugá den Sala Don Bosco na Buena Vista.
Un total di seis organisashon ta partisipá den e kampionato di vòlibòl hubenil aki. E komishon enkabesá pa Gayla Stroop a introdusí un sistema nobo, kaminda e timnan ta hunga tres wega òf mas riba un dia i a duna e evento aki e nòmber di Festival di Vòlibòl.
Na apertura di e kampionato e ekiponan a desfilá dilanti e publiko i invitadonan. Nelson Maria ku ta miembro di direktiva di Federashon Deporte I Olimpiko Kòrsou (FDOK) ku alabes ta liasòn di vòlibòl hubenil a hiba palabra na apertura i tambe a hasi e sake inisial dje kompetensia den Sala Don Bosco.
Den kategoria femenino e sigiuente resultadonan a keda registrá: Shuatanari A vs Jumping Jewels 3-1, Hurricane vs Shuatanari B 3-1, Stakamahakchi vs Xaverianen 3-1, Shuatanari A vs Hurricane 1-3, Stakamahakchi vs Jumping Jewels 3-1, Xaverianen vs Shuatanari B 3-1, Shuatanari A vs Stakamahakchi 1-3, Xaverianen vs Hurricane 1-3, Shuatanari B vs Jumping Jewels 3-1, Shuatanari A vs Xaverianen 3-1, Shuatanari B vs Stakamahakchi 1-3, Jumping Jewels vs Hurricane 1-3, Shuatanari A vs Shuatanari B 3-1, Jumping Jewels vs Xaverianen 1-3, Hurricane vs Stakamahakchi 3-1.
E resultadonan den kategoria mix maskulino/femenino i tambe maskulino ta lo sigiuente: Watakeli vs Stakamahakchi 1-3, Watakeli vs Xaverianen 1-3 i Stakamahakchi vs Xaverianen 3-1.
Hurricane ta na kabes dje kompetensia femenino ku 4 viktoria ku ta bon pa 15 punto. Stakamahakchi ta sigui na di dos puesto ku 3 triunfo i 1 derota, bon pa 13 punto. Sjuatanari A ta okupá di tres puesto ku 11 punto.
