Sport.cw

Sponsored by

Sponsored by

Sponsored by

Indians a flechá Wild Cats

Sta Rosa Indians ayeranochi, djasabra 19 di ei 2018, a kibra e invikto di Wild Cats Guardian Group/KJ74: 8-7. Tur dos tim awor tin 5 triunfo i 1 derota i ta komparti e promé lugá den Liga Aqualectra.

Federashon Beisbòl di Kòrsou (Febeko) a kontinuá ayera ku e kampionato di beisbòl dòbel A den Stadion Johnny Vrutaal na Rif, Otrobanda. Wild Cats ku a gana su sinku weganan te na e momento ei (5-0), a topa ku Sta Rosa Indians (4-1).

E Pushinan Brabu i Indjannan a sòru pa un tremendo wega. Durante di 6 inen niun dje dos timnan no a skor kareda. Sinembargo den e último tres turnonan un total di 15 kareda a keda anotá: 8 pa Sta Rosa Indians i 7 pa Wild Cats.

Tabata e Indjannan ku den kabes di shete inen a bai dilanti: 5-0. Den nan di ocho turno na bate nan a añadí 2 kareda mas pa tuma ventaha kómodo di 7-0 i tabata mustra di ta bai ku e viktoria. Sinembargo e Pushinan Brabu a den bòm di ocho inen a kòrtá e desventaha te na 1 kareda, anotando 6 karerda pa hasi e skor: 6-7. Den último entrada kada tim a hinka 1 kareda i asina e wega a kaba 8-7 pa Sta Rosa.

Picher ganadó a resultá Jordan Lucas, ku a bai 7,1 inen i a pèrmití 3 kareda i 8 hit. Ela ponchá 3 bateadó i duna 2 base por bola. Den di 8 entrada ela keda relevá pa Guisonne Sambo ku sinebargo a logra saka solamente un out pèrmitiendo 3 kareda i 3 hit. Sambo a traha lugá pa Gionelo Jansen ku tambe a saka un out, pero promé ku esaki a pèrmití 1 kareda i 2 hit. Finalmente Marvin Ludowika a drenta den di 9 inen i no a duna Wild Cats niun chèns, registrando 2 ponche.

E mihó bateadónan pa Sta Rosa Indians tabata Riordan Windster i Rutherson Ustasia. Windster a dal 3 hit den 4 turno i a hinka 3 kareda aden. Ustasia tabatin 2 hit den 5 turno i e tambe a hinka 3 kareda aden.

E derota di Wild Cats a bai riba nòmber di Richinel Matos, ku a bai 6 inen i a pèrmití 3 kareda i 2 hit. Ela ponchá 4 bateadó i duna 5 base por bola. E mihó bateadónan a resultá Terrence Goeloe i Raywendley van Gurp. Goeloe a bati 3 hit den 5 turno i ela sòru pa 1 kareda, miéntras ku Van Gurp tabata bon pa 2 hit den 5 turno ku ela yuda hinka 2 kareda aden.

 

 

Translate »