Sta Rosa Angels Vanddis a gana tur su kuater weganan te ainda den kampionato di sòfbòl femenino fast pitch dòbel A. E último viktima tabata The Fighting Team: 5-2. E kompetensia ta sigui awenochi, djasabra 19 di mei 2018, den Sabana Ballpark.

E kampionato 2018 ta keda organisá pa Curaçaose Softball Bond (CSB) i ta dediká na Pichingolo KIA/Nissan, ku a kumpli 45 aña di eksistensia.

Djaweps, 17 di mei, tabatin dos enkuentro den Sabana Ballpark. Sta Rosa a gana ku skor di 5-2 di The Fighting Team. Picher ganadó a resultá Janiska Franklin ku den 4 inen a pèrmití 2 kareda i 3 hit. Ela keda remplasá den di 5 entrada pa Leonella Elizabeth ku den 2 inen no a pèrmití kareda ni hit.

Pa Sta Rosa Angels a destaká na bate Kimberly Agard, Lyusska van ’t Kruys i Cyan Bernadina. Agard a dal 2 hit den 3 turno (3-2), miéntras ku Van ’t Kruys tabatin tambe 2 hit pero den 4 turno (4-2) i finalmente Bernadina tabata bon pa 1-1.

Den e otro wega djaweps Pichingolo KIA/Nissan a sigui ku su racha, ganando ku skor di 12-2 di Eagles Softex. Pichingolo a eksplotá den di 9 inen anotando 9 kareda pa amplia su ventaha di 3-2 pa 12-2.

E kampionato ta kontinuá awenochi den Sabana Ballpark ku dos enkuentro: Demolition Cartel NV vs Pichingolo KIA/Nissan i Sta Rosa Angels Vanddis vs Nos Tei Curaçao Office Supply.