Inter Willemstad i Skèrpènè a sali haragán riba gol den Kaya 6 den Liga MCB. Victory Boys a haña 4-1 serka e tim di Vredenberg, miéntras ku FC Sithoc a kai 3-0 kontra e ekipo di fraternan. Jong Holland tambe a gana su promé wega riba e promé fecha dje seri aki, superando SUBT ku skor di 1-0.
Federashon Futbòl Kòrsou (FFK) a disidi pa hunga tres wega pareu riba e promé fecha di Kaya 6. Inter Willemstad i Victory Boys a topa otro den stadion dje federashon, SUBT a hunga kontra Jong Holland den Stadion Dr. Antoine Maduro, miéntras ku den Stadion Ergilio Hato tabatin e wega entre Skèrpènè i FC Sithoc.
Jong Holland ku a kaba e kampionato regular na kabes ku 39 punto for di 18 wega, a skor na di 23 minüt e úniko gol dje wega kontra e tim di Kinchán. Esaki tabata danki na Jurensley Martina.
Den kampionato regular e timnn aki a tablá un biaha (1-1), miéntras ku Jong Holland a gana e otro wega tambe ku 1-0.
Inter Willemstad di su banda a bin bon prepará i tabata Ruensly Leuteria ku a kaba ku tur ilushon di Victory Boys. Ela skor e ultimo dos golnan pa e tim di Vredenberg gana ku skor di 4-1. E tabata eksitoso na di 45 minüt plus i na di 53 minüt. Davidson Rosa na di 20 minüt a habri e markadó, miéntras ku Rudrick Pop a skor na di 33 minüt.
Den kampionato regular e timnan aki a empatá un bia (1-1). E otro wega a kaba 4-3 na fabor di Victory Boys.
Finalmente Skèrpènè tambe a sali goloso, esta riba gol, kontra di FC Sithoc: 3-0. Nicolas Rocha Gomez a skor e promé gol na di 14 minüt. Na di 55 minüt Christopher Isena a dòbel skor. E di tres gol a kai na di 81 minüt i e goliadó tabata Maximiliano Ciarnello.
Kaya 6 ta sigui djabièrnè ku atrobe tres wega. Jong Holland ta hunga kontra di FC Sithoc den stadion di FFK den Brievengat. Victory Boys i Skèrpènè ta topa otro den Stadion Dr. Antoine Maduro den Kinchán, miéntras ku den Stadion Ergilio Hato den Brievengat tin e wega entre Inter Willemstad i SUBT. Tur tres wega ta kuminsá 8or di anochi.
