FC Don Bosco a kuminsá Kaya 4 di CurFutsal awenochi ku un kampanaso. E tim a sorprendé Securitas ku skor di 5 pa 4 i asina kue su promé dos puntonan. Den e otro wega di Divishon A Sta Rosa Stars desperdisiá algun bon chèns pa hinka gol i finalmente a pèrdè ku skor di 3-1 di FC San Lucas.
Fanatikonan ku a haña kaminda pa sala di rekreo Niels Liberia di Stadion Odulio Willems tabata testigu di dos tremendo wega di futsal. E apertura di Kaya 4 di CurFutsal a konta ku arbitrahe di Omar Pauletta, Heinrich Angel, Rolf Pranger, Franklin Benitez i na mesa Deetje Wederfoort.
FC Don Bosco ku den e kampionato regular a pèrdè ku skor di 8-1 kontra di Securitas, a ranka sali brabu ku dos gol den trempan di wega pa tuma ventaha di 2-0. E tim bou di guia di Jessica ‘Jess’ Victoria no tabatin basta i a hinka dos gol mas pa yega 4-0 i tabata mustra di ta bai goliá su kontrinkante.
Sinembargo Securitas poko poko pero sigur a haña su ritmo i tambe porta di gol. E tim di entrenadónan Rudleno Merenciana i Ivo Poulo a hinka dos gol pa kòrta e ventaha di Don Bosco na 4-2.
Ora tur kos tabata mustra ku Securitas tabata bon riba kaminda di rekuperashon, diripiente Don Bosco a skor su di 5 gol. Esaki a resultá tambe e gol di oro, pasobra apesar ku Securitas a skor dos gol mas, e tim no a logra hinka esun di empate i asina sorprendentemente sufri su promé derota den Kaya 4 di CurFutsal.
Ruensley Leuteria i Joël Victoria tabata e hòmbernan grandi pa Don Bosco. Kada un a skor dos gol. Rudrick Pop tambe a depositá e bala den nèt p’e tim. Pa Securitas Jhoannys Sivira a hinka dos gol, miéntras ku Jourichmar Martina i Freddy Hernandez a skor un biaha.
Den e di dos wega di Kaya 4 FC San Lucas tambe a sali brabu i mesora a hinka gol pa pika 1-0 dilanti kontra di Sta Rosa Stars. No a dura hopi ku e di dos gol tambe a kai i vários fanatiko a kere ku ta bai bin un goliada, komo ku den kampionato regular e tim a gana ku no menos ku 13 pa 1 dje ekipo di pariba.
Sta Rosa Stars sinembargo ku bon atake a logra hinka un gol pa bini bèk den e wega. E tim di pariba asta a haña algun tremendo chèns pa empatá i podise asta bai, pero e hungadónan di pariba no a logra kristalisá e chènsnan di gol. Den final di wega San Lucas a kaba ku tur ilushon dje tim kontrali anotando un di tres gol.
Jean Pauletta, Maikel Pinedo i Ashar Bernardus a skor pa FC San Lucas, miéntras ku e gol di Sta Rosa Stars tabata di Christopher Isenia. Asina San Lucas ku a kaba na promé lugá den kampionato regular i ku ta bou di guia di entrenadónan Julinald Martis i Clifford Braafhart, a registrá su promé triunfo. Apesar ku Sta Rosa Stars a pèrdè, e tim di entranadónan Dudmor Lindeborg i Jonathan Pietersz a hunga tremendo wega.
