Jong Colombia su mashin di gol a sigui drei zetá den e seri di weganan den e di dos buelta dje torneo pa Kopa Kòrsou. E klùp di Boca Samí a gana atrobe di New Song den wikènt, e biaha’ki ku skor di 6 pa 1. E tim saminero i Jong Holland te ainda no a pèrdè punto den e kompetensia.
Jong Colombia a skor te ku awor 36 gol i a risibí 2 kontra. E tim ta na kabes dje tabla di posishon den pul E ku 15 punto for di sinku wega.
Porsierto ku Darlyson Ellensburg di Jong Colombia ta e hiungadó ku mas gol te ainda den e torneo pa Kopa Kòrsou. Ela skor 11 gol te ku awor. Su kolega di tim Ivanny Calvenhoven ta sigui’é ku 10 gol.
Jong Holland tambe a sigui su racha di viktoria den e torneo ganando ku skor di 2 pa 0 di Union Deportivo Bándabou (UNDEBA). E trikolornan pues ta lider den pul D ku 15 punto for di sinku wega. E tim a hinka 25 gol i a risibí 4 kontra te ku awor.
Sport Unie Brion Trappers (SUBT) a logra su kuater viktoria den wikènt tras di lomba. E tim di Kinchán a gana di Hubentut Fortuna ku skor di 3 pa 1, i ta liderá pul A ku 13 punto for di sinku wega.
Skèrpènè tambe a gana su kuater wega den e kompetensia. E tim di fraternan a derotá FC Sithoc ku skor di 2 pa 1. Skèrpènè ta okupá e promé puesto den di pul C ku 13 punto for di sinku wega. Skèrpènè tambe ta produktivo den e torneo pa Kopa Kòrsou ku 22 gol na fabor i solamente 1 gol kontra.
Victory Boys i Inter Willemstad a empatá na 0 gol ku otro den wikèn. E dos timnan ta kompartí e liderato den pul B ku 10 punto. Esaki ta produkto di tres viktoria, un empate i un wega pèrdí. Inter Willemstad tin un mihó saldo di gol ku 13 gol na fabor i 4 kontra, miéntras ku Victory Boys a hinka te ainda 8 gol i risibí 2 kontra.
Centro Dominguito tambe a gana. E tim aki a derotá Stallions FC ku skor di 3 pa 0. Ku e viktoria akí e tim a pasa pa komandá pul F ku 10 punto for di kuater wega. Esaki ta produkto di tres viktoria i un empate.
E torneo di futbòl pa Kopa Kòrsou ta sigui djaweps den stadion Rignaal Jean Francisca na Brievengat. Pa 7or di anochi Centro Deportivo Sta Rosa ta topa Stallions FC, miéntras ku Atlétiko Saliña i Centro Dominguito ta hunga 9or kontra di otro.