Despues di a logra su di 12 wega salbá djalina ei, Kenley Jansen ayera djamars, 3 di yüni, a registrá su promé triunfo e temporada aki den Major League Baseball (MLB). E ‘closer’ yu di Kòrsou a logra e wega salbá i viktoria presisamente kontra su tim bieu ku ta Boston Red Sox.
Mènedjer Ron Washington ta sigui tin hopi konfiansa den Jansen. Ela hasi uzo dje yu di Kòrsou den dos wega tras di otro, pa’sina seyá e viktorianan riba Boston.
Jansen ayera no tabata mesun efikas manera den e wega djaluna kaminda ela retirá e tres batiadónan tras di otro. Un dia despues ela duna dos hungadó ‘base por bolas’, pero tòg a logra un bes pa silensiá Boston i no pèrmití kareda. Ela mantené e skor pareu: 3-3.
Pues e timnan a pasa pa hunga inen èkstra. Manager Washington den di dies ineng a tuma e desishon pa kambia Jansen. E desishon di e manager pa manda Reid Detmers riba montíkulo a resultá un bon desishon. E picher ku tabata aktivo den e wega djaluna, ayera a retirá e tres batiadó tras di otro.
Komo ku Los Angeles Angels a skòr un kareda den e promé parti dje di dies ineng i a bai dilanti 4-3, e viktoria a bai pa Jansen. Esaki ta e promé triunfo dje yu di Kòrsou e temporada aki. Awor su rèkòrt ta di 1 wega ganá i 2 pèrdí.
Un detalhe interesante ta ku Ceddanne Rafaela tambe a bria den e wega, aúnke ku su tim Boston Red Sox a pèrdè: 3-4. E outfielder yu di Kòrsou a dal un tremendo homerun den di seis ineng den Fenway Park, pasiná empatá e skor na 3 kareda.
Rafaela tabatin un bon anochi na bateo. Ela kaba ku 3 hit den 5 turno na bate. Ku su di sinku homerun dje temporada akí den MLB, ela empuhá 2 kareda.
Los Angeles Angels a gana tambe di Boston Red Sox djaluna. E tim di Kenley Jansen a pika dilanti den e promé ineng, ora ela skor 6 kareda. Boston tiki tiki a baha e diferensia te na 1 kareda dor di skor 1 kareda den di tres ineng i kuater kareda man den di sinku ineng: 5-6. Sinembargo Los Angeles Angels a skòr un kareda mas den di seis pa hasi e skor 7 pa 5.
Despues ku e tim di Rafaela a skor 1 kareda mas den di ocho inning (6-7), mènedjer Ron Washington di Los Angeles Angels a disidí pa manda Jansen riba montíkulo den di nuebe ineng pa salba e wega.
E closer yu di Kòrsou no a defrauda su manager. Ela tira un ineng retirando e tres batiadónan tras di otro. Kenley Jansen a kuminsá e ineng ponchando Wilyer Abreu. Después Carlos Narváez a bati un flai pa centrofield, miéntras ku Romy Gonzalez a bati un flai pa rightfield pa e di tres out.