Ceddanne Rafaela di Boston Red Sox ta mira bèk riba un bon seri kontra di Los Angeles Angels. E outfielder yu di Kòrsou a dal 6 hit den 14 turno na bate, bou di kua 3 homerun.
Ku su homerun den di nuebe ineng ayera djarason e pelotero di 24 aña a yuda su tim gana ku skor di 11 pa 9 di Angels. Esaki ta su di seis homerun e temporada akí den Major League Baseball (MLB).
Rafaela a bin bati den di nuebe ineng ku e skor empatá na 9 kareda. Ku un kolega den sirkulashon, ela dal un bala haltu pa right field. Den promé instansia tabata parse ku e bala ta bai pasa na e banda drechi dje ‘foul pole’, pero finalemente ela keda banda robes di esaki i a kai den tribuna pa un homerun.
E homerun dje yu di Kòrsou a nifiká e desempate dje wega i alabes e viktoria pa Boston Red Sox. Esaki ta un konsolashon pa e tim di Rafaela ku a pèrdè e dos otro weganan den e seri kontra Los Angeles Angels. Djaluna Boston a pèrdè ku skor di 7 pa 6 i djamars ku skor di 4 pa 3.
Rafaela a tèrminá djaluna ku 2 hits den 4 turno, inkluyendo su di kuater homerun e temporada akí. Ela dal esaki den di ocho ineng. No tabatin niun kompañero di tim den sirkulashon. Djamars ela bati 3 hit den 5 turno, entre nan su di sinku homerun e aña akí. Ku e homerun aké Rafaela a empuhá 2 kareda pa Boston Red Sox empatá e skor na 3 kareda, pero su tim a pèrdè finalmente e wega ku skor di 4 pa 3.
E outfielder yu di Kòrsou ta bati awor pa un average di .252 punto. Esaki ta e resultado di 51 hit den turno na bate. E hitnan aki ta konsistí di 10 doblete, 2 tripel, 6 homerun i e sobrá hitnan ta single. Ku su hitnan Rafaela a empuhá te ku awor 25 kareda pa Boston i e mes a skòr 35 biaha. Mas aleu e tin 7 base hòrtá.
Un punto negativo ta ku Rafaela a ponchá te ku awor 43 biaha. E maneho di Boston Red Sox ta haña e kantidat akí muchu haltu. Ta pesei e maneho a diseñá un seshon spesial di trein bateo pa e yu di Kòrsou.
Un dato interesante ta ku yu di Kòrsou Kenley Jansen di Los Angeles Angels tambe a sobresalí den e seri di su tim kontra di Boston Red Sox. Djaluna ela logra su di diesdos wega salbá i djamars ela registrá su promé triunfo e temporada akí.
Despues di un dia liber awe djaweps, Boston Red Sox ta kuminsá mañan ku un seri di tres weganan kontra di New York Yankees. Los Angeles Angels tambe ta kuminsá mañan djabièrnè, despues di tabata djaweps liber, ku un seri di tres wega kontra di Seattle Mariners.