Kenley Jansen realmente ta e angel salbadó di Los Angeles Angels. E ‘closer’yu di Kòrsou a salba dos wega mas pa su tim riba djabièna i djesabra. Asina ela yega 14 wega salbá den e temporada aki, i tin awor 461 den su karera di 16 temporada den Major League Baseball (MLB).
Mènedjer Ron Washington di Los Angeles Angels djabièrnè a manda Jansen riba montíkulo den di nuebe ineng. Su tarea tabata pa no laga Seattle Mariners skor mas kareda na momento ku Angels tabata dilanti ku 5 pa 4.
Jansen a kumpli ku e tarea ku Washington a dun’é. Ela logra dominá e tres batiadó di Seattle, i asina seyá su di 13 wega salbá e aña’ki. Di e ocho balanan ku ela tirá, seis tabata straik.
Un dia despues, djasabra, Washington a bolbe yama Jansen pa pichá den di nuebe ineng. Na e okashon aki Los Angeles Angels tabata dilanti ku skor di 8 pa 5 kontra Seattle Mariners.
Despues di saka e promé batiadó out, Cal Raleigh a dal’é duru pa su di dos homerun den e wega. Despues dje homerun akí, Jansen a pèrtá brasa i a dominá e siguiente dos batiadónan. E a tira 14 bala kontra e kuater batiadónan, di kua 10 tabata straik. Su tim Los Angeles Angels a gana ku skor di 8 pa 6.
Den kaso ku Jansen logra salba 17 wega mas, e ta empatá èks pitcher Lee Smith. Esaki ta okupá di kuater lugá riba e lista di relevistanan ku mas tantu wega salbá ku 478 wega. Eks pitcher Mariano Rivera ta lider apsoluto ku 652 wega salbá, sigui pa Trevor Hoffman ku 601.