Meskos ku seleshon nashonal di futbòl di Kòrsou, Haiti tambe a gana su di tres wega den e torneo eliminatorio di Concacaf pa Mundial. Aruba a pèrdè djasabra na kas ku skor di 5 pa 0 kontra e selekshon haitiano. Esaki ta nifiká ku Kòrsou i Haiti ta kompartí e liderato den grupo C i a klasifiká pa e di tres buelta dje eliminatorio.
Despues ku Kòrsou a gana djabièrna anochi ku skor di 4 pa 0 di Saint Lucia den Ergilio Hato Stadion, Haïti un dia despues tambe a logra un viktoria riba e selekshon rubiano na Aruba. Tur dos tim pues a keda invikto i ta na kabes den grupo C ku 9 punto for di tres wega.
Ta ofisial ku Kòrsou i Haiti, faltando 1 wega, a klasifiká kaba pa e di tres buelta dje torneo eliminatorio di Concacaf pa Mundial. E wega ku nan falta ta presisamente kontra di otro. E wega akí ta tuma lugá mañan, djamars anochi 10 di yüni, na Oranjestad, Aruba.
Kòrsou a hinká te ainda 10 gol den e di dobs buelta dje eliminatorio di Concacaf i a haña solamente un gol kontra. Haiti tambe a hinkba 10 gol, pero a pèrmií dos gol kontra.
Den nan último kuater weganan den siklo di Concacaf, Kòrsou i Haiti ta pareu. Tur dos selekshon a gana un biaha i a empatá dos biaha.
Na 2019, Kòrsou i Haiti a hunga dos wega den e kampionato Nations League. Selekshon di Kòrsou a gana dia 7 di sèptèmber ku skor di 1 pa 0, i tres dia despues a empatá na 1 gol ku Haiti.
Na 2011 e dos selekshonnan a topa otro atrobe dos biaha den e torneo eliminatorio regional pa Mundial. Dia 6 di sèptèmber Haiti a gana ku skor di 4 pa 2 di Kòrsou, i riba dia 11 di òktober e timnan a empatá na 2 gol ku otro.
Den grupo F dje eliminatorio di Concacaf e selekshon nashonal di Surnam a sigui prestá bon. E tim a gana djabièrna ku skor di 1 pa 0 di Puerto Rico. E surnameñonan ta lider den grupo F ku 9 punto for di tres wega. El Salvador ta okupá di dos puesto ku 7 punto.
Honduras ta lidera grupo A tambe invikto ku 9 punto for di tres wega, siguí pa Cuba ku 6 punto. Den grupo B Costa Rica tambe ta invikto na kabes ku 9 punto, siguí pa Trinidad & Tobago ku 7. Grupo D ta liderá pa Nicaragua i Panama ku 9 punto. Mas aleu Guatemala i Jamaica tampoko no a pèrdè niun wega i kompartí e promé puesto ku 9 punto.
Fuera dje seis timnan ku a gana nan grupo, esnan ku tèrminá na di dos lugá tambe ta pasa pa e di tres buelta dje eliminatorio. E 12 selekshonnan ta hunga den tres grupo di kuater tim. Den e fase aki nan ta hunga dos welta den e formato di ‘round robin’, ku ta nifiká ku tur tim ta topa otro dos biaha. E tres timnan ku gana nan grupo ta klasifiká pa e Mundial, miéntras ku e dos mihó timnan ku tèrminá na di dos lugá ta bai hunga e asina yamá ‘intercontinental play-offs’