Jong Holland i Jong Colombia no a pèrdè niun punto te ainda den e torneo di futbòl pa Kopa Kòrsou. E dos timnan ta bai na kabes den nan pul ku 18 punto for di seis wega: Jong Holland den pul D i Jong Colombia den pul E.
Jong Holland a logra su seis triunfo ganando djadumingu ku skor konvinsente di 5 pa 0 di SV Indekor. Di su banda Jong Colombia a gana djaluna ku skor moderá di 3 pa 0 di SV Atomic.
E tim mas serka di Jong Holland den pul D ta Union Deportivo Bándabou (Undeba), ku ta sigui sinembargi ku un diferensia di 9 punto. Undeba a derotá Centro Hubenil Mahuma djadumingu ku skor di 4 pa 0. Esaki tabata e di tres viktoria pa Undeba den pul D. E tim a pèrdè tambe tres wega i tin pues 9 punto for di seis wega. SV Indekor i Centro Hubenil Mahuma ta kompartí e di tres lugá ku 4 punto kada un.
Den pul E Jong Colombia tambe ta sigui komfortabel na kabes. E tim di Boca Sami ta siguí na di dos lugá pa SV New Song. E ekipo aki a gana djaluna di SV De Koning ku skor di 4 pa 1 i tin 10 punto awor.
Mas aleu Centro Dominguito tambe no a pèrdè niun wega ainda, pero sí e registrá dos empate den e torneo. E tim a gana ku skor di 2 pa 1 di Centro Deportivo Sta Rosa. E tim di Dominguito ta na kabes di pul F ku 14 punto for di seis wega: kuater viktoria i dos empate. Sta Rosa ta okupá e di dos puesto ku 12 punto, ku ta produkto di kuater viktoria i dos derota.
Victory Boys tambe a logra den wikènt tras di lomba un viktoria reimu den pul B. E tim di Sapaté a gana di C-Stars United ku skor di 5 pa 0. Inter Willemstad tambe a registrá un triunfo ganando ku skor minimal (1-0) di SV Vriendschap Eendracht Sterken Tegen Alles (Vesta).
E resultadonan ei ta nifiká ku Victory Boys i Inter Willemstad ta sigui na kabes di pul B, kada un ku 13 punto. Tur dos tim a gana kuater wega, empatá un biaha i a pèrdè tambe un biaha te awor den e torneo pa Kopa Kòrsou.
Sport Unie Brion Trappers (SUBT) tabatin e skor di mas grandi den wikènt. E tim di Kinchán a gana ku skor di 8 pa 1 di FC Inter. Ku esaki SUBT ta sigui lider den pul A, awor ku 16 punto for di seis wega.
Den e mesun pul A Hubentut Fortuna a gana ku skor di 4 pa 2 di Hatian Union Club. Danki na e viktoria aki e ekipo di Seru Fortuna a subi riba e tabla di posishon i ta komparté e di dos puesto ku e mesun tim di futbolistanan Haïtiano ku 7 punto.
Den pul C Skèrpènè a gana ku skor di 4 pa 1 di Union Deportivo Tera Kòrá, miéntras ku FC Sithoc a derotá Wishi Marchena ku skor minimal di 1 pa 0. Skèrpènè pues ta sigui komo lider den pul C ku 16 punto for di seis wega: sinku viktoria i un empate. FC Sithoc ta okupá di dos lugá ku 10 punto: tres wega ganá, un empate i dos derota.
