Kòrsou a terminá e di dos buelta eliminatorio di Concacaf pa Mundial di futbòl ku un ‘blue wave’ perfékto riba Aruba. Kontra tur predikshon e selekshon nashonal bou di guia di Dick Advocaat a gana Haiti ku un skór di 5 pa 1, i asina pasa pa e siguiente fase komo ganadó di grupo C.
Mayoria analista di futbol tabata pensa ku Kòrsou i Haïti empatá. E dos selekshonnan ya anteriormente a kwalifiká pa e di tres buelta dje fase di eliminashon di Concacaf pa e Mundial.
Ademàs, den nan último kuater partido den kuadro di Concacaf, Kòrsou i Haïti a mustra ku nan ta hopi pareu na nivel, ku resultado di un victoria pa kada pais i dos empate.
Un empate na Aruba lo tabata sufisiente pa Kòrsou keda ofisialmente ganadó di grupo, pa motibu di saldo di gol mas miho. Promé ku e último wega den grupo C, selekshon di Kòrsou tabatin 10 gol i 1 só kontra, mientras ku Haiti tabatin mestantu 10 gol, pero dos den su kontra.
Concacaf a skohe pa laga hunga e wega entre Kòrsou i Haïti riba tereno neutral, den Estadio Guillermo Trinidad na Oranjestad, Aruba. E selekshon di Haiti ya tabata na e isla, despues di un viktoria grandi di 5 pa 0 di Aruba. E selekshon di Kòrsou a bulá pa Aruba despues dje viktoria di 4 pa 0 riba Saint Lucia.
E wega na Aruba a kuminsá ku Haito ku e miho wega, pero Kòrsou tabata e prome ku a skòr. Gervane Kastaneer a habri e skòr den di 12 minüt, i tres minüt despues Kenji Gorré a pone e skòr na 2-0. Despues di sosiego Deedson Louicius a duna Haïti speransa ku un gol den e di 61 minüt. Ocho minüt despues Jearl Margaritha a pone Kòrsou dilant 3-1. Den di 89 minüt Kevin Felida a hinka e di kuater gol, i den tempo di leshon (90+3) Jeremy Antonisse a seyá e viktoria di Kòrsou: 5 pa 1.
Kòrsou a terminá e di buelta den grupo C ku 12 punto for di kuater partido. E selekshon a hinka 15 gol i a risibí dos só kontra. Haïti a keda ku 9 punto (tres viktoria i un pèrdida), ku 11 gol hinká i 7 kontra.
Mañan djaweps tin e sorteo pa e di tres i último buelta dje torneo eliminatorio di Concacaf pa Mundial.