Selekshon nashonal di futbòl di Kòrsou ta hunga djamars awor, 17 di yüni, kontra di El Salvador na Miami. E wega aki ta den kuadro di Concacaf Gold Cup, den kua 16 seleskshon ta kompetí.
E kompetensia regional pa Gold Cup ta kuminsá mañan djasabra na Miami. Kòrsou ta den grupo B huntu ku El Salvador, Honduras i Canada.
Selekshon nashonal bou di direkshon di Dick Advocaat ta hunga djamars kwartu pasá di 8 anochi kontra El Salvador den PayPal Park. Canada i Honduras ta topa ku otro mitar di 11 anochi den stadion BC Place.
E di dos wega di Kòrsou ta riba 21 di yüni kontra Canada. E enkuentro aki ta planiá pa 7or anochi den Shell Energy Stadium. Den mesun stadion akí Honduras i El Salvador ta hunga kontra otro pa 10or di anochi.
E útimo wega di grupo pa Kòrsou ta riba 24 di yüni kontra Honduras. E enkuentro akí ta kuminsá 10or anochi den PayPal Park. Na mesun ora Canada i El Salvador ta hunga kontra di otro den Shell Energy Stadium.
E torneo di Concacaf pa Gold Cup ta kuminsá pues mañan djasabra 14 di yüni i ta dura te 6 di yüli. E kompetensia ta kuminsá ku weganan di grupo. Den e fase aki, timnan dividí den kuater grupo ta hunga un biaha kontra di otro entre djasabra akí pa 24 di yüni.
Den grupo A ta hunga Mexico, Còsta Rica, Surnam i Repúblika Domínikano. Den grupo B tin pues Canada, Honduras, El Salvador i Kòrsou. Grupo C ta konsistí di Panama, Jamaica, Guatemala i Guadeloupe. Den grupo D tin e selekshonnan di Merka, Haiti, Trinidad & Tobago i Saudi Arabia, ku ta partisipá komo pais invitá.
E kuater ganadó di grupo i e numbernan dos (pues ocho tim total) ta pasa pa e sigiuente buelta eliminatorio. E fase di nòkout akí ta kuminsá ku weganan di kwartfinal riba dianan 28 i 29 di yüni. Despues ta sigui ku weganan di semifinal riba 2 di yüli i e final ta hunga djamars 6 di yüli.
