Excellence a fortifiká su liderato e torneo femenino pa Kopa Kòrsou. Esaki ta despues ku e tim a registrá su di kuater viktoria ganando ku skor di 2 pa 1 di Union Deportivo Bándabou (Undeba). Den e otro wega Inter Willemstad a propiná Hubentut Fortuna esaki su promé derota ganando ku skor di 3 pa 0.
E kompetensia femenino a sigui ku e dos weganan ei den stadion Dr Antoine Maduro na Kinchán. E torneo entre tantu ta den su di dos buelta.
Excellence a habri e skor den e di 16 minüt pa medio di e hungadó Gionella Cristal Calvenhoven. Tres minüt despues, Ruwenna Antonia Cristina a skor e gol di empate pa Undeba. Finalmente Eliana Elisa a hinka e gol di viktoria den di 70+1 minüt pa Excellence.
Den e otro enkuentro Kadisha Martina a sobresalí pa Inter Willemstad. Ela hinka dos dje tres golnan kontra di Hubentut Fortuna. E tabata eksitoso den di 51 i 59 minüt. E tin awor 7 gol den e torneo. Lauryn Richardson tabata esun ku a habri e skor den e wega hinkando gol den di 47 minüt.
Despues di e resultadonan ei Excellence ta sigui na kabes hopi komfortabel ku 13 punto for di sinku wega: kuater viktoria i un empate. Hubentut Fortuna ta sigui ku 8 punto: dos viktoria, dos empate i un derota. Inter Willemstad ta okupá di tres puesto ku 7 punto: di dos wega ganá, un empate i dos derota. Undeba ta na e último lugá sin punto.
E torneo femenino pa Kopa Kòrsou ta sigui otro siman djarason ku atrobe dos wega. Esakinan ta tuma lugá den stadion Rignaal Jean Francisca. Pa 7or di anochi Hubentut Fortuna ta hunga kontra Excellence, i pa 9or tin e wega entre Undeba i Inter Willemstad.