The Pink Panthers a gana pa di tres aña konsekutivo e Varsity Challenge Cup. E tim den final di e kompetensia di Girls Basketball League a derotá The Challengers ku skor di 57-18.
Anteriormente e final den Junior Varsity a tuma luga, ku Spartans saliendo kampion i Amazone supkampion. Den wikènt tras di lomba tabatin e final den e kategoria máksimo Varsity. Un públiko grandi a haña kaminda pa sala di deporte Niels Liberia na Suffisant pa wak e wega’ki.
For di komienso dje wega e tim di The Pink Panthers a tuma ventaha i no a pèrdè esaki mas. The Challengers tabatin problema pa haña ritmo di wega i a keda kai mas atras den skor sin por kòrtá e desventaha.
Fuera dje kopa di kampion i supkampion, Girls Basketball League tabatin tambe diferente premio disponibel pa e hungadónan ku a sobresalí. Asina e Sportsmanship Award a bai pa Jasmine Kaddoura Chamseddine, mientras ku Caitlin Lichtenberg a tèrminá komo Most Valuable Player (MVP). E award di Most Improved Player a bai pa Tsutae Martis Guillermo. Angelina Martis a kleim e premio pa Best Defensive Player, miéntras ku Chai-Sheena Sorhaindo a gana e award di Rookie of the Year.
Despues di su eksitoso kompetensianan di basketbòl femenino hubenil, Girls Basketball League ta informá ku su próksimo aktividat ta planiá pa fin di yüli, ora ku dos tim di Kòrsou tuma parti na e kampionato Hulandés di basketbal. Na kuminsamentu di ougùstùs tambe tin partisipashon di Kòrsou den e torneo ‘Under the Rim 3×3’ ku ta tuma lugá na e Islanan Kanario na Spaña.
Picture taken by: C. Bregita
