E selekshonnan di Liga Pabou i Liga Pariba te ainda ta invikto den e kampionato di Karibe di Senior League. Tur dos a gana tambe ku relativo fasilidat nan weganan.
Kòrsou ta kompetí komo pais anfitrion dje kampionato ku dos tim. Liga Pabou riba e promé dia di kompetensia djaluna a gana dos wega. E tim a derotá Boneiru ku skor di 9 pa 2 i Repúblika Dominikana ku skor di 14 pa 4. E weganan akí a tuma luga den Tio Daou Ballpark.
E otro dos weganan riba djaluna a tuma lugá den MonTab Ballpark. E selekshon di Liga Pariba a gana ku skor di 11 pa 0 di Puerto Rico, miéntras ku Aruba a superá Boneiru ku skor di 10 pa 0.
E kompetensia regional a sigui ayera djamars. Puerto Rico a logra su promé viktoria ganando di Repúblika Dominikana ku skor di 18 pa 6. E selekshon di Boneiru a pèrdè di Liga Pariba ku skor di 19 pa 0. Mas Liga Pariba a bolbe mira akshon i a vapuliá Repúblika Dominikana ku skor di 15 pa 0, miéntras ku e selekshon di Liga Pabou a derotá Aruba ku skor di 7 pa 3.
E kompetensia ta sigui awe djarason ku wega for di mainta entre Boneiru i Repúblika Dominikana i Aruba kontra di Puerto Rico. Atardi Aruba ta bolbe hunga, e biaha’ki kontra Liga Pariba. Finalemente pa 8or di anochi Liga Pabou i Puerto Rico ta hunga kontra di otro.
Picture taken by: Jacinto de Jesus
