Jong Holland ketu bai ta invikto den e kampionato di futbòl lokal. E tim trikolor ayera djarason, 11 di mart, a tabla na sero gol ku Skèrpènè pa asina keda sólido na promé puesto den Liga MCB, ku 29 punto for di 13 enkuentro.
Federashon Futbòl Kòrsou (FFK) a sigui ku su kompetensia den promé divishon. Esaki a tuma lugá den Stadion Ergilio Hato na Brievengat.
Jong Holland ku den su último kompromiso siman pasá riba 7 di mart a gana ku skor di 2-0 di Subt, ayera a registrá su di 5 empate dje kampionato tablando na sero gol ku Skèrpènè. E tim trikolor a gana 8 wega te ku awor i ta na e promé lugá ku 29 punto.
Skèrpènè ku anteriormente riba 6 di mart a kai kontra Undeba ku skor di 1-2, via dje empate ku Jong Holland awor tin 24 punto for di 13 enkuentro. E tim ta okupá e di dos puesto riba tabla di posishon ku 7 viktoria, 3 tabla i 3 derota.
Vesta tambe tin 24 punto i pues ta kompartí e di dos puesto ku Skèrpènè. E tim di Buena Vista porsierto a gana dia 8 di mart di Victory Boys ku skor di 2-1 i ta hunga mañan djabièrnè kontra di Centro Social Deportivo Barber. E klup aki ta na di kuater puesto ku 23 punto: 7 triunfo, 2 empate i 3 derota. E wega entre Vesta i Centro Barber ta tuma lugá den Stadion Dr. Antoine Maduro i ta kuminsá 8or di anochi. fff
