Jong Holland ta e úniko tim ku tin dos triunfo for di igual kantidat di wega den promé divishon di Federashon Futbòl di Kòrsou (FFK). E trikolornan a derotá Union Deportivo Bandabou (Undeba) ku skor di 3-0 den Liga MCB.
E kampionato di futbòl a kontinuá den wikènt ku 5 enkuentro den Stadion Antoine Maduro, Kintjan. Un total di 19 gol a keda di skor den e di dos seri di wega.
Jong Holland ta komandá e tabla di posishon ku 6 punto for di 2 wega, despues ku djabièrnè ela derotá Undeba ku 3-0. Na di 33 minüt Quinton Burk a pone e Trikolornan dilanti. Rendell Girigorie na di 65 minüt di wega a ampliá e skor, miéntras ku na di 67 minüt Randall Winklaar a hasi e wega 3-0 ku kua skor e enkuentro a finalisá tambe.
E kompetensia a sigui djasabra anochi ku e enkuentro entre Skèrpènè i ‘Vriendschap Eendracht Sterken Tegen Alles'(VESTA). E tim di fraternan a gana ku skor di 3-1. Jimbertson Vapor tabata goleadó pa e supkampion di Kòrsou, Skèrpènè. Ela skor na di 60, 67 i 71 minüt. E úniko gol pa e tim di Buena Vista i besindario a keda anotá pa Mirco Colina na di 90 minüt via di tiru penal. E promé gol di Vapor tambe tabata for di un pinalti.
E di dos enkuentro riba djasabra a bai entre Centro Dominguito i Jong Colombia. E tim kampion di Kòrsou a gana ku skor di 2-0 dje Samineronan ku e aña’ki a promové pa promé divishon. Ya na di 7 minüt Ivanny Calvenhoven a habri e skor, miéntras ku na di 45 minüt Geryon Alberto a pone e tim di Dominguito 2-0 ariba.
Awe djadumingu Inter Willemstad a gana ku 4-1 di Victory Boys. E golnan dje tim ganadó tabata di Rudrick Pop (21 minüt), Dwight Belliot (65), Rayson Koeiman (72) i Vylison Lake na di 83 minüt di wega. Cedrickson Antonia a skor na di 46 minüt e úniko gol di e ekipo di Noord Zapateer.
Den e di dos wega di awe, Centro Social Deportivo Barber a derotá Hubentut Fortuna: 3-2. Apenas e enkuentro a kuminsá ku Michael Albertus a pone e tim di Barber dilanti na di 1 minüt. Tres minüt despues Naigel Valorian a amplia e skor: 2-0. Na di 32 minüt Yoan Codiñez a kòrta e ventaha pa e tim di Seru Fortuna: 1-2. Sinembargo na di 60 minüt Ramon Phelipa di Hubentut Fortuna ta anotá un outogol: 1-3 pa Barber. Finalemente Rendell Girigorie ta skor na di 65 minüt i e wega a kaba 3-2 pa Centro Barber.
Jong Holland ta na kabes su so ku 6 punto, siguí na di 2 puesto pa Centro Dominguito i Skèrpènè ku 4 punto. Centro Barber, Undeba, Inter Willemstad i VESTA tin 3 punto, Victory Boys i Jong Colombia tin 1 punto miéntras ku Hubentut Fortuna ta sin punto.
E kompetensia den Liga MCB ta kontinuá djabièrnè 24 di novèmber ku e wega entre Skèrpènè i Centro Barber. E enkuentro aki ta kuminsá 80r di anochi den Stadion Antoine Maduro na Kintjan.
