Sport.cw

Sponsored by

Sponsored by

Sponsored by

Angels i Nos Goso kampion

Sta Rosa Angels den kategoria Fast pitch i Nos Goso den klase 35+ awe, djadumingu 19 di novèmber 2017, a titulá kampion dje promé edishon dje Torneo Candia Paulo-Felipa. E tim di Sta Rosa a gana den final di Pichingolo Nissan, miéntras ku Nos Goso a dal Rising Trotters.

E Torneo Candia Paulo-Felipa a kuminsá djaweps i kontinuá djabièrnè i djasabra i a haña su kulminashon awe djadumingu. E kompetensia a tuma lugá den Post 6 Ballpark na Rio Canario. Souax Softball Team a organisá e torneo di sòfbòl femenino aki.

E ekiponan ku a kompetí a keda repartí den dos grupo, esta kategoria 35+ i Fast pitch U20. Den kategoria 35+ tabatin 6 tim reparti den 2 pul. E ekiponan den pul A tabata The Friends, Treasure New Era i Warriors. Den pul B a hunga e timnan Nos Goso, Rising Trotters i Shining Stars. Kategoria Fast pitch U20 a konsistí di 3 ekipo. Esakinan tabata Pichingolo, Souax i Sta Rosa Angels.

Den kategoria Fast pitch e tim di Sta Rosa Angels Vanddis a topa ku Pichingolo Nissan den final. For di e promé entrada karedanan a drenta na bòshi: 4 pa Angels i 3 pa Pichingolo. Den di dos entrada Sta Rosa ta tuma mas distansia anotando 3 kareda mas: 7-3.

Den e sobrá 3 entradanan Angels a skor 7 kareda mas, miéntras ku Pichingolo a anotá 4 mas. Pa Sta Rosa: 14 kareda, 8 hit i 3 eror. Pichingolo: 7 kareda, 9 hit i 5 eror. Picher ganadó pa Angels tabata Quilin Coeriel, miétras ku Kimberly Agard a dal 1 hit den 1 turno na bate. Picher Ashante Alexandre a pèrdè e wega pa Pichingolo, miéntras ku Stephany Smith a sali mihó bateadó ku 2 hit den 3 turno.

Por sierto ku Sta Rosa Angels Vanddis a titulá kampion dje Torneo Candia Paulo-Felipa invikto. E tim a gana su 3 enkuentronan ku relativo fasilidat.

Den kategoria 35+ Nos Goso tambe tabata den gran forma. E tim a gana den final ku skor di 14-4 di Rising Trotters. Picher Carlientje Cleopa a skibi e viktoria tras di su nòmber, miéntras ku Emely Jonis (2-2), Leonise Avastia (2-2) i Dayhisa Kouls ku 3 hit den 3 turno (3-3) a sali mihó bateadó. Picher Louise Ortega a karga ku e derota.

 

Translate »