Sta Rosa Angels ayera, djasabra 18 di novèmber 2017, a gana dos wega ku blankeo den e promé edishon dje Torneo Candia Paulo-Felipa. E kampionnan di sòfbòl di Kòrsou a derotá primeramente Souax Softball Team i despues Pichingolo Nissan.
E Torneo Candia Paulo-Felipa a kontinuá ayera djasabra ku vários enkuentro den Post 6 Ballpark na Rio Canario. E kompetensia a kuminsá djaweps i ta organisá pa Souax Softball Team.
E ekiponan ta repartí den kategoria 35+ i Fast pitch U20. Den kategoria 35+ tin 6 tim reparti den 2 pul. E ekiponan den pul A ta The Friends, Treasure New Era i Warriors. Den pul B ta hunga e timnan Nos Goso, Rising Trotters i Shining Stars. Kategoria Fast pitch U20 ta konsistí di 3 tim. Esakinan ta Pichingolo, Souax i Sta Rosa Angels.
Djasabra tabatin komienso dje kompetensia den kategoria Fast pitch U20. Sta Rosa Angels den su promé enkuentro ayera a gana ku skor di 4-0 di Souax Softball Team. Picher ganadó tabata Ludnella Isenia, registrando wega di sin hit ni kareda. Jandely Ricardo i Quilen Coeriel a sobresalí ku 1 hit den 1 turno na bate. Picher pèrdèdó tabata Chrissiantly Ogenia.
Despues Souax Softball Team i Pichingolo Nissan a topa otro. Den e promé 3 entradanan e timnan a trit e fanátikonan riba un tremendo wega. Tur dos ekipo a skor 1 kareda den nan di 3 turno na bate: 1-1. Despues di esaki e wega a habri kompletu for di otro ku Pichingolo anotando 7 kareda i Souax 8 kareda pa pues gana ku skor di 9-8.
Picher ganadó pa Souax tabata Thanysha Gil, miéntras e mes a sali mihó bateadó ku 1 hit den 1 turno. Ashantely Alexandre tabata e picher pèrdèdó pa Pichingolo, miéntras ku Arjenette Bernadina a dal 2 hit den 2 turno.
E di tres wega a bai entre Sta Rosa Angels i Pichingolo Nissan. Tabata Angels ku a baha for di vèlt komo tim ganadó: 12-0. Picher ganadó tabata Quilen Coeriel, miéntras 3 hungadó a terminá ku 1 hit den 2 turno: Kimberly Agard, Lidianne Chirino i Maria Macias. Picher pèrdèdó pa Pichingolo tabata D’yshanique Camelia, miéntras ku Arjenette Bernardina i Anais Piar a bati 1 hit den 1 turno na bate.
Tambe tabatin 2 wega den kategoria 35+. Nos Goso a gana ku skor di 16-4 di Rising Trotters. Picher ganadó tabata Murielle de Jongh, miéntras ku Dianne Hersisia a dal 3 hit den 3 turno na bate. Nos Goso tabatin 3 homerun den e wega. Picher pèrdèdó a resultá Natalie Juliana.
Den e último wega riba djasabra Treasure New Era a gana ku skor di 10-2 di Warriors. Carina Flounia a sali picher ganadó, miéntras ku Chumilin Eduarda tabata e picher pèrdèdó.