Treasure New Era i Nos Goso a gana nan wega riba e di dos dia di kompetensia dje Torneo Candia Paulo-Felipa. Tur dos ekipo a gana via di blankeo. Un total di 25 kareda a keda di skor.
Souax Softball Team ta organisá e promé edishon dje Torneo Candia Paulo-Felipa. Esaki ta tuma lugá den Post 6 Ballpark na Rio Canario. E kompetensia a ranka sali djaweps, miéntras ku ayera djabièrnè tabatin apertura ofisial i kontinuashon dje evento.
E ekiponan ta repartí den kategoria 35+ i Fast pitch U20. Den kategoria 35+ tin 6 tim reparti den 2 pul. E ekiponan den pul A ta The Friends, Treasure New Era i Warriors. Den pul B ta hunga e timnan Nos Goso, Rising Trotters i Shining Stars. Kategoria Fast pitch U20 ta konsistí di 3 tim. Esakinan ta Pichingolo, Souax i Sta Rosa Angels.
Riba e di dos dia di kompetensia Treasure New Era a sali brabu riba The Friends: 17-0. Minerva Maduro a resultá e picher ganadó, miéntras ku e mihó bateadónan tabata Marilyn Martis i Sulema La Cruz. Martis tabatin 3 hit den 3 turno ku 1 homerun i La Cruz tabata bon ku 2 hit den 2 turno bou di kua tambe 1 homerun. Judeska Kastaneer tambe a dal un homerun.
Picher IgnadalisGarcia a karga ku e derota, miéntras ku Josmaye Chirino i Idelien Martis a sobresalí na bate pa The Friends ku 1 hit den 1 turno. Esaki ta e di 2 derota pa The Friends den e torneo.
Den e di dos enkuentro di anochi Nos Goso a gana ku skor di 8-0 di Shining Stars. Picher Carlientje Cleopa a sali picher ganadó. Emely Jonis i Natalie Lourens tabata mihó bateadó, tur dos ku 3 hit den 4 turno. Pa Shining Stars Grace Girigorie a terminá komo picher pèrdèdó, miéntras ku Celeste Fransisca a bati 3 hit den 3 turno. Esaki ta e di 2 derota pa Shining Stars den e kompetensia.
