Jong Holland a kontinuá ku su racha viktorioso den kampionato di futbòl di Kòrsou. E tim trikolor a goliá Jong Colombia, djasabra 9 di dezèmber 2017, ku skor di 4-1 i awor ta komandá e tabla di posishon ku 13 punto for di 5 enkuentro.
Federashon Futbòl di Kòrsou (FFK) a kontinuá den wikènt ku e kampionato den promé divishon, esta Liga MCB. E kompetensia aki ta hunga den Stadion Antoine Maduro na Kintjan.
Despues ku Jong Holland a tabla wikènt pasá 0-0 ku Victory Boys, e tim trikolor a kontinuá e kampionato ku su di 4 viktoria den 5 wega. E trikolornan a gana ku skor di 4-1 di Jong Colombia.
E ekipo Saminero a tuma ventaha den final di promé tempu. Tabata Gersinio Constancia ku via di pinalti na di 44 minut a pone Jong Colombia ariba. E alegria tabata sinembargo di durashon hopi kòrtiku, pasobra Charles Martina 1 minüt despues a empatá pa Jong Holland. Esei no tabata basta, pasobra mesun hungadó aki na di 46 minüt a skor e gol di ventaha pa su tim.
Jurensley Martina a hasi e wega 3-1 pa e tim trikolor, ora ku ela hinka gol na di 75 minüt di wega. Na di 82 minüt mesun hungadó aki a disidi e enkuentro anotando su di dos gol pa Jong Holland gana ku 4-1. E trikolornan ta sigui na promé lugá den Liga MCB ku 13 punto.
E otro wega ku tambe a tuma lugá riba djasabra, tabata ‘Vriendschap Eendracht Sterken Tegen Alles’ (VESTA) ku a gana. E tim di Buena Vista i besindario a dal Union Deportivo Bándabou ku skor tambe di 4-1.
Jursley Kroonstadt na apenas 4 minüt di wega a pone VESTA 1-0 dilanti. Na di 21 minüt tabata Ethelbert Daal ku a skor p’e ekipo di Buena Vista (2-0) pa despues Shurwendel Roosje na di 47 minüt hasi e wega 3-0. Christopher Isenia a salba honor pa Undeba ora ela skor na di 53 minüt. Dos minüt despues Reylison Otto a hinka e di 4 gol pa VESTA.
Victory Boys parse a kue kaminda di viktoria. Despues k’e ekipo di Zapaté i besindario a tabla wikènt pasá ku Jong Holland, riba djabièrnè ela gana ku skor di 2-0 di Hubentut Fortuna. E golnan a keda di skor pa Sendly Bito na di 27 minüt di wega i Suly Kentz na di 40 minüt.