Xaverianen awe, djadumingu 10 di dezèmber 2017, a propiná Watakeli su promé derota den klase maskulino superior di vòlibòl: 3-1. Den klase femenino superior Stakamahachi sí a sigui ku su racha viktorioso ganando ku skor di 3-0 di Hurricane.
Federashon Vòlibòl di Kòrsou (Fevoko) a kontinuá awe ku e kampionato di vòlibòl ku 4 wega den klase superior. E fanátikonan ku a akudí na sala kubrí Errol Rooi di Sentro Deportivo Kòrsou (SDK), a disfruta di bon enkuentronan.
Den klase maskulino superior Xaverianen a logra kibra invikto di Watakeli. E enkuentro a bai 4 sèt. E tim supkampion a sali gana e dos promé sètnan i pues pone Watakeli ku lomba kontra muraya: 25-23 i 25-16. E ekipo kampion di Kòrsou a logra gana e di tres sèt pa hasi e wega 1-2: 25-22.
E dos timnan a batayá fuertemente den di 4 sèt kontra di otro. Finalmente tabata Xaverianen ku a baha for di kancha komo ganadó dje sèt aki i pues tambe e wega: 28-26. Quinten Anthony i Homi Cathalina a sobresalí pa e tim supkampion di Kòrsou.
Den e otro enkuentro den klase maskulino superior tambe e wega a bai 4 sèt ku Stakamahachi ganando di Green Tigers: 3-1. Esaki tambe tabata un enkuentro duru bringá. E sètnan: 26-24, 25-18, 22-25 i 25-23 na fabor pues di Stakamahachi.
Den klase femenino superior Stakamahachi a sigui invikto ora ku e tim a gana su di 4 wega dje kompetensia. Ela superá Hurricane ku skor di 3-0: 25-19, 25-15 i 25-21. Den e otro wega den mesun klase Shuatanari a gana ku skor di 3-0 di Green Jewels: 25-10, 25-15 i 25-13. Durenne Rosalia a destaká pa Shuatanari.