Centro Barder a rekuperá dje derota di wikènt pasá kontra Centro Dominguito, ganando awe -djadumingu 10 di dezèmber 2017- ku skor di 2-0 di Inter Willemstad. Den e di dos wega di awenochi Centro Dominguito i Skèrpènè a empatá 1-1.
Federashon Futbòl di Kòrsou (FFK) a kontinuá djadumingu ku dos enkuentro valido p’e kampionato den promé divishon, esta Liga MCB. Tur e weganan ta tuma lugá den Stadion Antoine Maduro na Kintjan.
Despues ku Jong Holland i VESTA a gana djasabra ku skor di 4-1 di respektivamente Jong Colombia i Undeba, djadumingo Centro Barber a pasa ku 2-0 riba Inter Willemstad. E golnan dje tim di Barber a keda di skor pa Deannejive Willems na di 70 minüt i Naigel Valorian na di 90 minüt.
Den e di dos enkuentro a bai entre e kampion di Kòrsou Centro Dominguito i supkampion Skèrpènè. E tim di fraternan a sali brabu anotando na apenas promé minüt dje wega. Jimbertson Vapor ta esun ku a hinka gol i asina pone Skèrpènè 1-0 dilanti. E gol di empate a kai na 83 minüt via di Samuel Matheus: 1-1.