Shuatanari ayera, djarason 6 di dezèmber 2017, a logra su di tres triunfo sin derota den e kampionato di vòlibòl klase A. E tim a gana ku skor di 2-0 di Watakeli.
Federashon Vòlibòl di Kòrsou (Fevoko) ta organisá e kampionato di vòlibòl den klase superior, klase A i hubenil. E weganan di klase A ta hunga riba djaluna i djarason i den wikènt tin enkuentronan hubenil, miéntras ku den klase superior e tin wega riba djadumingu.
Tur wega dje kampionato ta tuma lugá den sala kubrí Errol Rooi di Sentro Deportivo Kòrsou (SDK) na Brievengat. E kompetensia tin entre tantu 3 siman aden.
Shuatanari a bolbe logra un triunfo ayera djarason den klase A femenino, derotando Watakeli den 2 sèt. Apesar ku e skor no ta mustra, pero no tabata un mishon fasil pa Shuatanari. E sètnan: 25-18 i 25-17. Wenchi Hart a sobresalí atrobe pa Shuatanari.
Den e otro wega den klase A femenino tabata Stakamahachi ku a logra su di 2 viktoria dje kampionato kontra 1 derota. E tim den un enkuentro hopi emoshonante a gana ku skor di 2-1 di Hurricane. E sètnan tabata 25-23, 22-25 i 15-11. Anais Conradus a destaká pa Stakamahachi.
Riba djaluna 4 di dezèmber tambe tabatin 3 wega den klase A kategoria maskulino. Watakeli #1 a gana di Stakamahakchi ku skor di 2-0: 25-17 i 25-13). Xaverianen a supera Watakeli #2 ku skor di 2-1: 25-16, 20-25 i 18-16. I finalmente Titus tambe a bai kas kontentu derotando Green Tigers 2-0: 25-21 i 25-22.
Teksto na foto
Shuatanari ta ketu bai invikto den kampionato di vòlibòl den klase A femenino.
Foto: Fevoko