Kenley Jansen no a logra di bira e di dos yu di Kòrsou ku e renchi kodisiá di World Series. Su tim Los Angeles Dodgers ayera, djarason 1 di novèmber 2017, a pèrdè e di 7 wega dje seri final di Major League Baseball (MLB) di Houston Astros: 1-5.
Astros a sali brabu riba e picher habridó di Dodgers Yu Darvish i for di trempan pone base pa e triunfo. E ekipo a skor 2 kareda den su promé turno na bate i despues 3 kareda den di 2 entrada pa bai dilanti 5-0.
Tabata George Springer ku a hasi e daño mas grandi kontra di Darvish. Ela dal un doblete den su promé turno i a skor un kareda, miéntras ku den su di 2 turno ela konektá un homerun ku un kompañero riba base. Esaki tabata su di 5 homerun den e seri final. Ela keda skohé tambe komo hungadó mas balioso dje Seri Mundial.
E daño tabata hasí kaba ora ku mènedjer Dave Roberts di Dodgers a disidí na kambia Darvish pa Brandon Morrow. Tambe a mira akshon despues Clayton Kershaw, Kenley Jansen i Alex Wood. Tur a logra dominá e ofensiva di Houston i huntu a ponchá 9 bateadó, di kua Kershaw a registrá 4, Wood 3, Jansen i Morrow 1.
Miéntras ku Kenley Jansen i e picher a hasi nan trabou, nan kompañeronan a logra skor solamente 1 kareda kontra e pichernan di Houston. Esaki tabata den di 6 entrada. Un total di 10 koredó di Dodgers a keda riba basenan.
Apesar ku Dodgers no a gana Seri Mundial, tòg Kenley Jansen por mira’tras riba un tremendo final. Ela mira akshon den 6 dje 7 weganan, a salba 2 partido i pèrdè un enkuentro. E derota aki tabata e úniko ku e yu di Kòrsou a sufri e aña aki den MLB. Ela ponchá 8 bateadó di Houston den final i a pèrmití 2 kareda, tur 2 tabata homerun.
E derota ayera ta nifiká ku Kenley Jansen tòg no ta bira e di 2 yu di Kòrsou ku un renchi di World Series. E úniko ku tin 3 dje renchinan aki ta Hensley Meulens ku te ku e aña aki a fungi komo ‘hitting coach’ di San Francisco Giants i ku entre tantu a keda promové pa ‘bench coach’ dje tim aki. Huntu ku Giants e yu di Kòrsou a gana Seri Mundial na 2010, 2012 i 2014.
