Union Deportivo Bandabou (Undeba) ayera, djadumingu 5 di novèmber 2017, a gana e promé wega di kampionato di futbòl di Kòrsou 2018. E tim bou di mando di direktor tèkniko Emo Schotborg a triunfá ku skor di 4-0 riba Hubentut Fortuna.
Federashon Futbòl di Kòrsou (FFK) ta organisá e kompetensia den promé i segundo divishon. Tur enkuentro di promé divishon, esta den Liga MCB, ta tuma lugá den Stadion Antoine Maduro na Kintjan, mihó konosí tambe komo stadion di SUBT.
E kampionato ta keda patrosiná pa Maduro & Curiel’s Bank (MCB). Karchi pa tur wega ta kosta 6 florin pa fanátiko di 13 aña i mas bieu, miéntras ku mucha entre 6 pa 12 aña ta paga 2,50.
Riba djaweps 2 di novèmber, algun dia promé ku e kampionato lokal den promé divishon ranka sali, FFK a premiá e mihó hungadó dje kompetensia 2017. Esaki a resultá Glenciene Gregoria di Jong Holland. E otro nominadonan tabata Jimbertson Vapor i Randal Winklaar. Komo Nobato di Aña a sali Kevin Juliana di Undeba, miéntras ku Arthur Gosepa a sali Arbitro di aña.
E timnan ku e aña’ki ta kompetí den Liga MCB ta: kampion 2017 Centro Dominguito, supkampion 2017 RKSV Scherpenheuvel, Jong Holland, Centro Social Deportivo Barber, Inter Willemstad, VESTA, Undeba, Victory Boys, Hubentut Fortuna i Jong Colombia. E último aki a promové di segundo pa promé divishon, miéntras ku SUBT a degradá di promé pa segundo divishon di FFK.
Ayera djadumingu Undeba a sali brabu den su promé kompromiso kontra di Hubentut Fortuna. E tim di Bandabou for di 2 minüt di wega a pika dilanti. Tabata Jonathan Geertruida ku a skor. Mei ora despues tabata mesun hungadó ku a ampliá e skor: 2-0.
Promé ku arbitro fluit pa final dje promé tempu, Lendell Johanes ta hinka e di 3 gol pa Undeba. Na di 70 minüt di wega Chris Isenia ta skor di 4 gol pa e tim di Bandabou kontra Hubentut Fortuna ku ta bou di mando di direktor tèkniko Gershon Rifaela.
E promé MCB Man of the Match dje kampionato di FFK 2018 a resultá Jonathan Geertruida. E hungadó aki tabatin un ròl determinante den triunfo di Undeba.
E kompetensia den Liga MCB ta kontinuá wikènt ku 4 enkuentro. Riba djabièrnè 10 di novèmber ta topa otro 8or di anochi Inter Willemstad i Jong Holland. Djasabra tin 2 wega. Pa 7or di anochi ta sali kontra di otro Centro Dominguito i Victory Boys, miéntras ku 9or ta planiá e wega entre Jong Colombia i Scherpenheuvel. Riba djadumingu pa 6or di atardi tin e enkuentro entre Centro Barber i VESTA.
Foto: FFK/LIGA MCB