Andrelton Simmons a gana su di 3 Want’i Oro den Major League Baseball (MLB). Esaki ta e promé premio pa e yu di Kòrsou komo shòrt stòp di Los Angeles Angels of Anaheim den Liga Merikano.
Na dos okashon anterior Andrelton Simmons a gana e Want’i Oro komo mihó hungadó den shòrt pa Atlanta Braves den Liga Nashonal. Ela debutá ku e tim aki na aña 2012. Na aña 2015 e yu di Kòrsou a pasa pa Angels den un dil mionario entre Atlanta i Anaheim.
Fuera ku Andrelton Simmons a gana 3 Want’i Oro, ela yega di gana diferente otro premio di renombre manera por ehèmpel National League Rawlings Platinum Glove Award, Wilson MLB Overall Defensive Player of the Year Award i no menos ku 4 Fielding Bible Awards.
E aña aki Andrelton Simmons a hunga den 158 wega di Angels. Ela dal 164 hit den 589 turno na bate, di kua 14 homerun. Ku su hitnan ela sòru pa empuhá 69 kareda i e mes a skor 77 bia pa su tim. Ela kaba e temporada ku un average di .278 punto.
Andrelton Simmons tabata un dje nominadonan pa gana aña pasá tambe e Want’i Oro pa mihó shòrt stòp, pero un leshon a strob’é den su intento i asina e premio a bai pa Francisco Lindor di Cleveland Indians. Ganando e award e aña’ki, e yu di Kòrsou ta bira e di 4 shòrt stòp di Angels ku ta logra esaki. Esnan ku a gana promé ku ne tabata Erick Aybar, Orlando Cabrera i Jim Fregosi.
E promé yu di Kòrsou ku a gana Want’i Oro den MLB ta Andrew Jones. Ela gana esaki no menos ku 10 okashon komo mihó sènterfilder den Liga Nashonal, esta di 1998 pa 2007. Esaki tabata komo hungadó di Atlanta Braves.
