Liemarvin Bonevacia ta nominá pa e premio kodisiá di Atleta di Aña 2017 di Hulanda. E ta e úniko yu di Kòrsou ku un nomishon. Koninklijke Nederlandse Atletiek Unie (KNAU) riba 14 di dezèmber ta anunsiá kua ta su mihó atletanan.
KNAU ta skohé den 4 kategoria su mihó atleta. Esakinan ta Atleta Femenino di Aña, Atleta Maskulino di Aña, Para Atleta di Aña i finalmente Talento di Aña.
Liemarvin Bonevacia i e otro nominadonan a pasa den un proseso severo di skrutinio. E komishon enkargá ku esaki a analisá tur atleta su prestashon tantu nashonal komo internashonal entre 1 di oktober 2016 pa 30 di sèptèmber 2017. E atletanan su puesto riba tabla di posishon mundial tambe ta hunga un ròl importante. E staf tèkniko di KNAU finalmente a anunsiá resientemente ken ta e atletanan nominá.
- E mihó prestashon di Bonevacia e temporada aki tabata na Belgrado. E yu di Kòrsou a gana medaya di bròns riba distansia 400 meter durante kampionato bou di dak (Indoor) di Oropa.
For di aña 2013 Bonevacia ta representá Hulanda den kompetensianan internashonal. Su promé partisipashon bou di bandera Hulandes tabata den kampionato mundial na Rusia, kaminda ku ela kore den e disiplina estafèt 4x 100 meter pa Hulanda i e tim a terminá na di 5 puesto den final.
Na aña 2012 Bonevacia a kompetí na Weganan Olímpiko na Londres riba e distansia 400 meter. Esaki ela hasi bou di bandera Olímpiko, pasobra na aña 2010 Antia a stòp di eksistí ku Kòrsou birando pais outonomo den Reino Hulandes, pero Komité Olímpiko Internashonal (IOC) no a rekonosé Kòrsou komo pais partisipante.
Den promé buelta di 400 meter Olímpiko na Londres, Bonevacia a registrá un tempu di 45,60 sekònde i asina klasifiká pa semi final. E tempu aki tabata porsierto su mihó tempu personal i asta tambe e mihó tempu den Reino Hulandes. Den semi final sinembargo e yu di Kòrsou durante kareda a sufri un leshón na su hamstring ku a strob’é den su mishon pa konkistá un medaya Olímpiko.
Na aña 2014 Bonevacia a bira kampion di Hulanda riba 400 meter. Ela hasi esaki ku un tempu rèkòrt di 45,41 sekònde. Na aña 2015 e yu di Kòrsou a kore 0,01 sekònde mas lihé, pero su tempu di 45,40 sekònde pa un fayo atministrativo no a keda rekonosé komo un rèkòrt nobo Hulandes.
Awor aki un hurado di eksperto ta vota riba e nominadonan den kada kategoria. E hurado ta konsistí di ekspertonan den atletismo, redaktornan deportivo i tambe públiko mag di vota. Esaki por te ku 30 di novèmber riba e sigiuente lenk: https://www.atletiekunie.nl/verkiezingen2017
Tin ku aksentuá ku Bonevacia tin chèns pa bira Atleta Maskulino di Aña 2017, pasobra e yu di Kòrsou tin ku su medaya di bròns na Belgrado e mihó prestashon di e tres nominadonan. E otro dos nominadonan ta Menno Vloon (bula haltu ku palu) i Eelco Sintnicolaas (multiple disiplina) ku no a gana niun medaya e aña aki pa Hulanda, pero kontrali na Bonevacia sí ta aparesé riba tabla di posishon mundial na respektivamente di 6 i 5 puesto.
Liemarvin Bonevacia riba su FB ta pidi fanátikonan pa vota pa su persona via di https://www.atletiekunie.nl/verkiezingen2017.