E selekshon di beisbòl di Kòrsou a gana ayera, djamars 20 di novèmber 2018, atrobe dje ekipo di University of Illinois. E biaha’ki e tim lokal a triunfá ku skor di 8-5. Esaki ta e di dos triunfo pa Kòrsou sin derota.
Federashon Beisbòl di Kòrsou (Febeko) na e momento aki ta organisá un seri di enkuentro entre selekshon di Kòrsou i Universidat di Illinois. Ta trata un mini torneo pa Kopa Kòrsou ku weganan den Tio Daou Ballpark.
E enkuentronan kontra e tim di beisbòl di Universidat di Illinois ta sirbi tambe komo preparashon pa e selekshon di Kòrsou, ku lo kompetí próksimamente den un kompetensia na Repúblika Dominikana. Na e isla di merengue aki lo organisá e promé edishon di Caribbean Baseball Tournament.
E selekshon di Kòrsou a gana e promé wega ku a tuma lugá djadumingu den Tio Daou Ballpark ku skor di 4-0. Picher Ruderly Manuel a gana e enkuentro aki, miéntras ku Sherman Lacrus tabata e mihó batiadó ku 2 hit den 2 turno na bate.
Djaluna e timnan a topa otro den Tio Daou Ballpark. E wega aki no tabatin ganadó, pasobra a yega nuebe inen ku skor empatá na 3 kareda. Kòrsou tabatin 3 kareda, 6 hit i 3 eror. Universidat di Illinois a registrá 3 kareda, 7 hit i 0 eror.
Ayera djamars e selekshon di Kòrsou a gana ku 8-5. Kòrsou a skor 1 kareda den promé inen pa bai dilanti 1-0. E Merikanonan a bòltu e skor den nan di dos turno: 2-1. Den bòm dje mesun inen aki Kòrsou a empatá i ku 3 kareda den di sinku inen tuma ventaha: 5-2. Universidat di Illinois den di seis entrada tambe a skor 3 kareda: 5-5. Finalmente Kòrsou a bolbe hinka 3 kareda den su di ocho turno i gana e enkuentro.
Picher ganadó tabata Alexander Rodriguez ku a drenta di relevo den di seis inen i durante 3 entrada a pèrmití solamente 2 hit. Sander Boeldak i Terrence Josephina tabata e mihó batiadónan. Boeldak a dal 2 hit den 3 turno, miéntras ku Josephina a bati tambe 2 hit pero den 4 turno. Un di su hitnan tabata un homerun.
