Sport.cw

Sponsored by

Sponsored by

Sponsored by

Kòrsou a pèrdè via nòkout

E selekshon di Kòrsou a pèrdè den final awe, djadumingu 9 di dezèmber 2018, via nòkout di Repúblika Dominikana: 11-1. Esaki a nifiká ku e tim Dominikano a titulá kampion dje promé edishon dje torneo pa Kopa di Karibe.

E promé kompetensia pa Caribbean Cup a tuma lugá na Repúblika Dominikana. Un total di seis selekshon a kompetí den e torneo aki, kaminda ku e tim dje pais anfitrión a titulá kampion i Kòrsou supkampion.

Den e wega desisivo e picheo di Kòrsou no tabata por a kontené e ofensiva dominikano. E selekshon dje isla di merengue a bati 14 hit bou di kua 2 homerun.

Despues ku tur dos selekshon no a logra skor den promé inen, e tim dominikano a hinka 2 kareda den su di dos turno na bate pa den di tres inen añadí 7 kareda pa tuma ventaha komodo di 9-0. Den di shete entrada atrobe e tim anfitrión a skor 2 kareda: 11-0. Den bòm di mesun inen Kòrsou a hinka su úniko kareda i no por a evitá di pèrdè pa nòkout (11-1) i pone ku Sandley Martina di Kòrsou ku a fungi komo chief umpire, tabatin ku para e enkuentro.

Picher Risando Pastor a pèrdè e wega final. Den 2,1 inen ela pèrmití 5 kareda riba 7 hit i ela duna 2 base por bola. Cerillo Soleana a relevá Pastor den di tres inen, pero no a resultá pèrmitiendo 3 kareda riba 2 hit i ela duna tambe 2 base por bola sin saka niun out.

Na lugá di Soleana a drenta den mesun tres inen Ramses Jamanika ku a bai 4 inen pero a aña 3 kareda kontra riba 4 hit bou di kua 2 homerun. Finalmente Jerrison Beaumont a saka e último dos outnan den di shete inen sin pèrmití mas kareda.

E mihó batiadónan pa selekshon di Kòrsou tabata Rogier Boeldak, Jonathan Martijn i Terrence Josephina. Boeldak i Martijn a bati 3 hit den 3 turno, miéntras ku Josephina a dal 2 hit den 3 turno.

Translate »