Skèrpènè a gana su di kuater wega konsekutivo den promé divishon di futbòl di Kòrsou, esta Liga MCB. E tim di fraternan awe, djadumingu 9 di dezèmber 2018, a superá Centro Social Deportivo Barber ku skor minimo (1-0). Den e otro enkuentro Union Deportivo Bándabou (Undeba) a vapuliá Jong Holland ku skor di 7-1.
Federashon Futbòl di Kòrsou (FFK) a kontinuá ayera djasabra i awe djadumingu ku su kampionato den Liga MCB. Tabatin kuater wega den Stadion Dr Antoine Maduro na Kintjan.
Skèrpènè awenochi a kontinuá ku su racha ganando di Barber 1-0. E gol a kai faltando apenas 5 minüt pa wega kaba. Atrobe tabata Jimbertson Vapor ku hinka gol pa e tim di fraternan.
Ku e triunfo Skèrpènè a bolbe pasa pa komandá e tabla di posishon. Awor e tim tin 12 punto for di kuater wega. Centro Dominguito ku a gana djabièrnè di Sport Unie Brion Trappers (3-2) i pasa momentaniamente okupá e promé puesto, awor ta na di dos lugá ku 10 punto for di 4 wega.
Den oranan di atardi djadumimngu Undeba a humiá Jong Holland, kampion di Kòrsou i alabes supkampion di Kopa ABC, ku skor di 7-1. Norvianel Naar a hinka 3 gol na respektivamente di 22, 65 i 89 minüt. Aldrion Troeman a skor 2 biaha: na di 27 i 57 minüt. E sobrá golnan tabata di Lendel Johannes (62 minüt) i Adriaan Lourens den tempu di leshon (90+). Shardison Clarissa na di 73 minüt a salba honor pa Jong Holland.
Djasabra e tim Vriendschap Eendracht Sterken Tegen Alles (VESTA) a triunfá ku skor di 2-0 riba CVV Willemstad. Darlijson Ellensburg na di 32 minüt a kobra un pinalti ku eksito, miéntras ku na di 88 minüt Ethelbert Daal a hasi e wega 2-0.
E di dos enkuentro riba djasabra no tabatin ganadó. Victory Boys i Jong Colombia a empatá na 0 gol.
