Kòrsou awe djamars 18 di aprel a sigurá su promé 3 puntonan den grupo B dje 2023 CONCACAF Women’s Under-20 Championship, ganando di Bahamas ku skor di 7-0. Sinku dje golnan di Kòrsou a kai den promé tempu dje wega. E selekshon di Panama ta solido na promé puesto despues di a gana tambe di Sint Maarten ku 11-0.
E kampionato femenino hubenil di karibe a ranká sali djasabra ultimo den Stadion Rignaal ‘Jean’ Francisca den Brievengat. E kompetensia ta dura te ku djasabra awor 22 di aprel.
Despues di a pèrdè e wega di apertura ku skor di 5-1 di Panama, Kòrsou awe a logra gana su promé partido. Jeleaugh Rosa na di 14 minüt a skor e promé gol. Tres minüt despues Raëngelly Keller a hinka e di dos gol, miéntras ku na di 34 minüt ela bolbe skor: 3-0.
Dos minüt despues, esta na di 36 minüt, tabata Rosa ku a hinka su di dos gol pa hasi e wega 4-0. Faltando 4 minüt pa e promé mitar di wega kaba, Shermilyenne Leito a skor e di sinku gol pa Kòrsou. Mesun Leito na di 59 minüt tabata eksitoso atrobe: 6-0. Finalmente Nabiellene Nisia a hinka na di 79 minüt e di 7 gol pa Kòrsou.
Den e otro wega awenochi Panama a gana su di tres wega dje kampionato. E selekshon akí a goliá Sint Maarten 11 pa nada. Despues di a gana Kòrsou den e wega di apertura (5-1), e tim Panameño a superá Bahamas tambe ku skor abultá di 13-0. Pues den tres wega Panama a hinka 29 gol i haña solamente 1 gol kontra.
Den grupo D ku tambe ta hunga den Stadion Rignaal ‘Jean’ Francisca, Puerto Rico i Trinidad & Tobago ainda ta invikto den dos wega. E timnan aki ayera a gana respektivamente di Cayman Islands (6-0) i Guadeloupe (3-2).
Panama 5-1 riba Kòrsou
E selekshon hubenil femenino di Kòrsou a pèrdè su wega inisial den grupo B dje 2023 CONCACAF Women’s Under-20 Championship. E tim di Panama a gana ku skor di 5-1 awenochi, djabièrnè 14 di aprel.
E kampionato femenino di karibe a ranká sali awenochi den Stadion Rignaal ‘Jean’ Francisca den Brievengat. E kompetensia ta dura te dia 22 di aprel.
Porsierto ku Kòrsou ta anfitrión dje weganan den grupo B i tambe grupo D dje kampionato. Tur e weganan ta tuma lugá den Stadion Rignaal ‘Jean’ Francisca.
Despues dje wega inisial awenochi, tin e siuente dianan kada biaha dos wega. Esakinan ta planiá pa 3’or i 6’or di atardi den. Karchi di entrada ta kosta 5 florin i esaki ta disponibel tur dia for di 2’or di mèrdia na e lokètnan di stadion riba dianan di wega.
Den e wega di apertura den grupo B, tabata Jeleaugh Rosa ku a hinká e úniko gol di Kòrsou kontra di Panama. E siguiente wega di Kòrsou ta riba 18 di aprel. Esaki ta kontra dje selekshon di Bahamas i ta planiá pa 6’or di atardi den Stadion Rignaal ‘Jean’ Francisca!
