E selekshon maskulino di vòlibòl di Kòrsou a sali supkampion dje kompetensia regional Cazova U21. E tim di Barbados tabata superior den final: 3-0. E ekipo femenino a tèrminá na di sinku puesto den e kampionato ku a tuma lugá na Martinique.

Kòrsou pues a kompetí ku dos selekshon den e kampionato di Kariba di vòlibòl. Esaki a kuminsá dia 7 i tèrminá djasabra 14 di dezèmber na Rivière-Salée na Martinique.

E vòlibolistanan maskulino di Kòrsou a zona un kampanaso derotando den e serinan prefinal e fuerte selekshon di Trinidad & Tobago. Tabata un wega hopi pèrtá i pareu. Kòrsou a gana e wega ku skor di 3-2 ku e sigiuente parsialnan: 21-25, 25-21, 24-26, 25-20 i 15-11.

Ku e viktoria ei Kòrsou a klasifiká sorprendentemente pa final kontra di Bahamas, ku a pasa pa e wega final derotando Guadeloupe. Aki Bahamas tabata muchu fuerte pa Kòrsou: 3-0. Parsialnan: 25-14, 25-16 i 25-20.

E selekshon di Kòrsou tabata formá pa Gideon Willems, Dimanche Elsevijf, Timothy van Henneigen, Jonathan Pieter, Quijair Wever, Kanny Chatlein, Jashir Naaldijk, Nigel Albertus, Joshua van Henneigen, Jaden Naaldijk, Raydley Allee i Davidionel Isei. Henrich Daal tabata head coach i su asistente tabata Reno Martha.

 E selekshon femenino a gana den su último wega ku skor di 3-2 di Guadeloupe pa asina tèrminá na di sinku puesto. E parsialnan tabata: 25-20, 27-25, 15-25, 16-25 i 16-14.

E selekshon di Kòrsou tabata formá pa Shiony Belioso, Tahnee Gerard, Richaina Martis, Liz Rossen, Matilda van Grieken, Glovienelly Phelipa, Lakisha Hous, Girhangely St Hillaire, Argenette Wernet-Bernardus, Lyanne Albertus, Ivannia Sambo i Quianna St Hillaire. Entrenadónan Gilbert Paulina i Desi Servania tabata e entrenadónan.