Eks presidente di Federashon Beisbòl Kòrsou (Febeko) Micheline Heyliger ayera djarason 11 di dezèmber 2019, a organisá entrega di premio na hungadónan. Esaki, apesar ku e kampionato no a konkluí pero a keda suspendé despues di su retiro. Su premiashon a tuma lugá den edifisio di SVB, Otrobanda.
Durante e anochi di premiashon, Micheline Heyliger a tene un diskurso. Esaki ta literalmente loke ela trese dilanti: “Aunke ku e kampionato a wordu kanselá, hamas mi no por lubida ku bosnan a buta sifra i mundialmente ta buska sifra di pelotero ora ta interesa den nan prestashon. Ku mi a frakasá komo dirigente? Noooooo!”
“E loke ku mi a hasi pa beisbòl di Kòrsou tabata puro pa motibu di mi amor pa e deporte aki: Mi no a buska interes personal, mi no a bringa pa prestigio, mi no a lucha pa posishon ni poder i na promé lugá ma traha na bienestar di boso komo deportista i e deporte en general.”
“Bo ke tende di mi: Ami, Micheline Heyliger ta satisfecho ku mi konsenshi.
Mi ta spera ku tur sinseridat di kurason ku Dios yuda esnan ku sigui. Dios duna nan tur sabiduria i forsa pa nan por ehersé nan funshon komo tal i tambe duna nan wowonan di falki pa por detektá tempran e lobonan meimei dje karnénan i sigur pa nan traha pa e deporte engeneral.”
Mas aleu Micheline Heyliger a trese dilanti ku motibu di e anochi di premiashon ta pa demostrá tur hende ku e ta kumplidó i kargadó di su responsabilidat: “Mi ke terminá mi tarea awenochi premiando tur esnan ku a meresé di wòrdu premiá i asina kumpli ku mi palabrashon den kuadro di premiashon di e pelotero individual 2019. Mesun kos ku premio pelotaso ta algu ku mi a introdusí den beisbòl di Kòrsou, komo un insentivo, pa enkurashá i animá e beisbòlista, pa e traha duru, disipliná su mes, desaroyá, mehorá, krese i profeshonalisá su mes den su beisbòl.”
“Premio pelotaso tabatei pa rekompensá tur boso esfuerso pa duna un mihó beisbòl i brinda e fanatikada wega riba nivel. Danki na boso, sin boso no tin ni beisbòl ni direktiva te pa nos tin federashon. Hopi danki pa boso koperashon durante e periodo ku mi tabata tin e previlegio di funshoná na kabes di federashon. Danki di kurason na fanatikonan, hungadó, spònsernan, prensa, amigunan fiel i sin duda algun, mi yunan ku a karga mi den e trabou aki.”
Finalmente Micheline Heyliger a hasi menshon spesial dje spònsernan di e anochi di premiashon: Gai Lihe Tire Service, Seguros Doe y De Willems, KJ&K Multiservices NV, Consignaciones Caribe i spònsernan anónimo.
