E promé dje dos weganan amistoso entre selekshon di Kòrsou i El Salvador ayera, djaweps 16 di novèmber 2023, a terminá 1-1. Remarkabel tabata ku Kòrsou a piká dilanti na apenas 3 minut di wega i El Salvador a hinka e gol di empate 3 minüt promé ku final dje partido.
Federashon Futbòl Kòrsou (FFK) ta anfitrión dje selekshon di El Salvador. Originalmente e plan tabata pa e tim di Kòrsou via pa San Salvador pa e weganan amistoso.
Direktiva di FFK apenas un dia promé ku e seri amistoso di dos wega entre Kòrsou i El Salvador tuma lugá, a tene un enkuentro ku prensa. Esaki a tuma lugá na Corendon Mangrove Beach Resort, Otrobanda.
A planiá dos wega den Stadion Ergilio Hato i e promé tabata ayera’nochi. Juninho Bacuna na apenas 3 minüt den promé tempu a habri e skor pa Kòrsou, ku a defende esaki te kasi na final. Tabata Diego Alejandro Flores Sánchez ku na di 87 minüt a salbá El Salvador for di un derota ku skor minimo.
E di dos wega amistoso entre Kòrsou i El Salvador ta djaluna awor. Esaki tambe ta tuma lugá den Stadion Ergilio Hato di Sentro Deportivo Kòrsou (SDK). E ta kuminsá 8or di anochi.
