Selekshonnan di Liga Pabou ayera, djaweps 17 di mei 2019, gana su di dos wega den tantu Minor komo Little League. Liga Willemstad su selekshonnan a pèrdè ku skornan grandi. Atrobe e selekshon di Pabou a registrá un no hitter den Little League.
E organisashon di beisbòl pa mucha di Kòrsou a sigui ayera ku e seri di weganan di selekshon den Minor i Little League. Esaki ta bai entre Liga Pariba, Pabou i Willemstad. E ganadónan ta bai representá Kòrsou den kampionatonan regional.
E weganan di selekshon ta tuma lugá den Post 6 Ballpark na Rio Canario. Tur dos dia un públiko grandi a presensiá e enkuentronan.
Den e promé wega ayera ku tabata den Minor League, e selekshon di Liga Pabou a gana Liga Willemstad ku skor di 14-4. Picher Jay-Dair Kopra a gana e enkuentro aki, miéntras ku Reegan Randt Kirindongo i Isaac Acosta a dal kada un 2 hit den 2 turno.
Picher Alejandro Semeleer a sufri e derota pa Liga Willemstad. Qshondrison Doran tabata mihó bateadó ku tambe 2 hit den 2 turno.
Den Little League tambe Liga Pabou a gana ku skor grandi di Liga Willemstad: 22-1. Picher Kevin Rosina ku a drenta di relevo den promé inen a gana, miéntras ku Curley Martha i Shendrion Martinus tabata mihó bateadónan. Kada un a bati 4 hit den 4 turno.
Picher Jeremiah Jones a pèrdè e wega pa Liga Willemstad. E bateadónan no a dal niun hit.
E seri ta sigui awe ku Liga Pariba kontra Liga Willemstad den tantu Minor komo Little League.
