Liga Pabou a gana e derechi pa representá Kòrsou den kampionatonan regional den tantu Minor komo Little League. Esaki ta despues ku e dos selekshonnan di Pabou a terminá e seri di weganan invikto kontra di Liga Pariba i Willemstad.

E organisashon di beisbòl pa mucha di Kòrsou a organisá den fin di siman i wikènt serinan di wega pa selekshon den Minor i Little League. Esakinan a tuma lugá den Post 6 Ballpark na Rio Canario.

Den e último wega den Minor League, atrobe Liga Pabou a gana di Pariba, e biaha’ki ku skor pèrtá di 8-7. Den nan promé konfrontashon Pabou a gana konvinsente ku skor di 9-0.

Den e wega di ayera Timothy Mogen a resultá picher ganadó. Sherintley da Costa Gomez tabatin un atardi perfekto na bate pa Liga Pabou. Ela bati 3 hit den 3 turno. Pa Liga Pariba picher Franjean Haseth a pèrdè e wega, miéntras ku Dwayne Isenia a bati 1 hit den 1 turno.

Ku e viktoria di ayera e selekshon di Liga Pabou a terminá e seri invikto (3-0) i awor ta bai sigui prepará pa despues representá Kòrsou den e kampionato di Karibe próksimamente.

Den Little League tambe Liga Pabou a gana di Pariba: 8-5. Picher Curley Martha a gana e wega, miéntras ku Farans Wooter a sobresalí na bate pa Pabou ku 2 hit den 2 turno. Picher Nathanael Cijntje a sufri e derota pa Liga Pariba, miéntras ku Angemar Raiz a bati 2 hit den 3 turno.

Ku e triunfo di ayera, e selekshon di Liga Pabou a kaba e seri invikto (3-0). E selekshon aki ta bai representá Kòrsou komo tim number 1, miéntras ku Liga Pariba ta bira tim number 2 den e kampionato Latinoamerikano ku ta tuma lugá na Kòrsou. E pais anfitrión ta kompetí ku dos selekshon.

E organisashon di beisbòl pa mucha por mira’tras riba un eksitoso seri di weganan pa selekshon den Minor i Little League. Sinembargo ta bon pa e organisashon aki traha bon palabrashon ku e kuerpo di umpire den relashon ku prensa. Esaki pasobra den e último wega di Little League, e umpire di primera base sin nodi a limitá prensa den su funshonamentu.

Durante e seri di weganan no tabatin niun problema i prensa por a ehersé su trabou manera debe ser, pero ayera djasabra e umpire di primera base tabata outoritario i grosero ku reportero, kamarografo i fotografó di www.sport.cw.

Sí den e weganan anterior e representantenan dje wèpsait deportivo por a hasi nan trabou for di area dje dugoutnan na primera i tersera base, ayera e umpire aki tabata eksiguí pa nan para na altura dje porta ku ta kondusí na e dugout di primera base tòg. Ela bai dje leu ei asta na menasá di saka www.sport.cw for di riba tereno sí no kumpli ku su òrdu.

Aki www.sport.cw ta reprodusí tekstualmente un dje interkambionan ku un di su representantenan tabatin ku e umpire na primera base;

Umpire: Bo tin ku para aya banda di dugout!

Fotógrafo: Dikon?

Umpire: Pasombra ami ta bisa bo ta einan bo tin ku para!

Fotógrafo: Otro weganan ma para ei, aki i parti di e dugout ei (tersera base)

Umpire: Aya kaminda ma bisa bo tin ku para!

Fotógrafo: Si mi ke para na e otro dugout (mustrando tersera base) awor?

Umpire: Si bo no bai para aya kaminda ma bisa bo, MI TA SAKA BO FOI RIBA TERENO!!!

E representantenan di www.sport.cw a skohe despues dje menasa dje umpire pa bandoná tereno di wega boluntariamente i mesora a reklamá e aktitut grosero i outoritario aki dje umpire enkuestion serka Urny Florán i Lando Chirino dje organisashon di beisbòl pa mucha. Esaki a sosodé tantu verbalmente na Post 6 Ballpark komo via karta na direkshon di señornan Florán i Chirino.