E kompetensia di Senior League Caribbean 2023 a haña un final lokal: Liga Pabou kontra Liga Pariba. Tur dos tim a gana awe, djabièrnè 30 di yüni, nan wega den semi final ku relativo fasilidat. Pabou a mantené su invikto ganando ku skor di 15-0 di Puerto Rico, miéntras ku Pariba a saka sla riba Aruba: 14-0.
Despues ku Aruba den e buelta preleminar a gana di Liga Pariba ku skor di 13 pa 2, awe mitar di 3 tra’i mèrdia un otro gai a kanta. Liga Pariba a saka sla via di blankeo: 14-0.
E wega a kana pareu te ku di dos inen. Niun dje timnan no a logra skor kareda. Tabata Liga Pariba ku den di tres inen a hinka 7 kareda i bai dilanti 7-0. Den di kuater inen e tim di Kòrsou a bolbe skor 7 kareda i asina gana via di nòkout di Aruba: 14-0.
Liga Pabou ku no a pèrdè niun wega den e buelta preleminar, a bolbe gana di Puerto Rico den semi final. E bia’ki ku skor di 15-0. E wega aki a hunga 7or anochi tambe den Tio Daou Ballpark.
For di promé inen Liga Pabou a mustra di tin plan serio di mantené su invikto klasifikando pa final, ora ku ela skor 7 kareda. Den tur e sigiuente turnonan na Bate e tim a skor kareda: 2 den di dos inen, 3 den di tres, 2 den di kuater i 1 kareda den di sinku inen: 15 kareda.
E resultadonan ta nifiká ku Aruba i Puerto Rico mañan mitar di tres ta hunga pa e di tres puesto. Anochi 7or tin e wega final entre Liga Pabou i Liga Pariba. Tur dos wega meskos ku awe ta tuma lugá den Tio Daou Ballpark.
