Liga Pabou Kòrsou a titulá kampion invikto dje kompetensia di Senior League Caribbean 2023. Ela gana ayera djasabra 1 di yüli, den un wega emoshonante ku skor di 7 pa 5 di Liga Pariba. Pabou awor ta bai representá Karibe di 29 yüli te ku 5 di ougùstùs den World Series Senior League na Easley, South Carolina (Merka).
E tim di Liga Pabou a sali skor 2 kareda den su promé turno na bate pa bai ariba 2-0. Den bòm dje di dos inen Liga Pariba a skor 2 kareda pa empatá e wega: 2-2.
Sinembargo Pabou mesora a bolbe bai dilanti den kabes dje di tres inen ku 3 kareda nobo: 5-2. Pariba a skor 1 kareda den mesun inen i 2 mas den di seis inen pa bolbe empatá e wega: 5-5.
Den su di shete turno na bate Liga Pabou a bolbe skor 2 kareda pa atrobe tuma ventaha di dos kareda. Pariba no tabatin kontesta riba esaki i asina Pabou a gana e wega 7 pa 5 i tambe titulá kampion.
Picher I-Zion Mogen a gana e wega. Ela drentra di relevo den di kuater inen na lugá di Arshenaeu Martina ku a kuminsá riba montíkulo. E picher habridó aki den tres inen a pèrmití 3 kareda riba 2 hit i ela tira 4 ponche. Mogen den kuater inen a pèrmití 2 kareda riba 4 hit i ela ponchá 5 batiadó.
Clay Winklaar a kaba komo mihó batiadó di Liga Pabou. Ela dal 3 hit den kuater turno na bate. E tabata batiadó number sinku den alineashon I a hunga den center field. Su tres hitnan tabata bon pa 2 kareda (rbi).
Liga Pabou no a pèrdè niun wega den e kompetensia, ganado sinku den e buelta preleminar i dos den seri final. Puerto Rico a tèrmina na di tres puesto den Senior League Caribbean despues di a gana ku skor di 9 pa 8 di Aruba.
