E final dje kampionato di Karibe di Little League ta bai entre e selekshonnan di Liga Pabou i Liga Pariba. Tur dos tim a gana awe, djabièrnè 19 di yüli 2019, nan wega den semi final i asina tambe konservá nan status di invikto den e kompetensia.
E weganan dje kampionato di Kairbe di beisbòl Little League a tuma lugá na Kòrsou e aña aki. A hunga den e parke di beisbòl Post 6 na Rio Canario i tambe den Frank Curiel Ballpark na Sta Maria. E kompetensia a konta ku asistensia grandi di publiko i e final ta mustra di ta bai hala ainda mas fanatiko.
E selekshon di Liga Pariba awe a superá Aruba ku skor di 4-2. Picher ganadó tabata Jeziel Boekhoudt, miéntras ku Johaimry Balentina a destaká ku su bate. Ela dal 1 hit den 1 turno. Pa Liga Pariba 4 kareda, 9 hit i 2 eror.
Picher Zayger Tromp a karga ku e derota pa e selekshon di Aruba. Djean Macares a terminá komo mihó batiadó ku tambe 1 hit den 1 turno. Pa Aruba 2 kareda, 6 hit i 3 eeror.
Den e wega entre selekshon di Liga Pabou i Cuba, e tim di Kòrsou a gana ku skor di 2-0. Picher Jurdrick Profar a gana e wega. E no a pèrití hit na e batiadónaan di Cuba. Curley Martha tabata mihó batiadó ku 1 hit den 2 turno. Pa Kòrsou 2 kareda, 2 hit i 0 eror.
