Liga Pabou ta bai representá Kòrsou i Karibe den Little League World Series na Williamsport, New Jersey. E selekshon aki a bini djatras awe, djasabra 20 di yüli 2019, pa gana di Liga Pariba ku skor di 8-3 den final dje kampionato di Karibe.
Un publiko grandi a presensiá e wega final dje éksitoso kampionato di Karibe ku a tuma lugá na Kòrsou. Tabatin wega den parke di beisbòl Post 6 na Rio Canario i tambe na Frank Curiel Ballpark na Sta Maria.
Komo pais anfitrión dje kampionato di beisbòl, Kòrsou a kompetí ku dos selekshon. Tur dos a tèrminá e bueltanan preliminar invikto i den semi final a superá e selekshonnan di Cuba i Aruba. Pues e final tabata un asuntu lokal.
E selekshon di Liga Pabou a kuminsá bon tumando ventaha di 1-0 den bòm di promé inen. E tim di Pariba ku dos kareda di su di dos turno na bate a bòltu e skor na su fabor i asta ampliá esaki den kabes di tres inen: 3-1. Ku dos kareda den bòm dje di tres inen Liga Pabou a empatá e wega na 3 kareda pa finalmente eksplotá ku 5 kareda den su di sinku turno pa habri e enkuentro for di otro: 8-3.
Curley Martha a sali picher ganadó. Ela drenta wega den di dos inen i durante 5 inen a pèrmití solamente 1 kareda riba 5 hit. Ela ponchá 6 batiadó i duna 2 ‘base por bola’. Shendrion Martinus a kuminsá riba montíkulo i den 1 inen a pèrmití 2 kareda riba 2 hit.
Den kaha di bateo tambe Curley Martha a sobresalí pa Liga Pabou. Ela dal 1 hit den 1 turno, skor 2 kareda i haña 2 ‘base por bola’. Izion Mogen i Nathan Castillo tambe a dal e bala bon. Mogen a kaba ku 2 hit den 2 turno, miéntras ku Castillo a bati 1 hit den 2 turno. Esaki tabata un doblete. Ku su bataso ela sòru pa 3 kareda.
Kuater picher a mira akshon pa e selekshon di Liga Pariba. E picher pèrdèdó tabata Rubiorne Manuel ku den 4,1 inen a pèrmití 4 kareda riba 4 hit. Ela ponchá 7 batiadó i duna 4 ‘base por bola’.
Nathanael Cijntje a sobresalí na bate pa Liga Pariba. Ela bati 2 hit den 3 turno, di kua un tabata un triple.Davidson Antonia i e úniko mucha muhé den e kampionato Thaima Maximiliana tambe a destaká den kaha di bateo. Kada un a dal 1 hit den 1 turno.
E selekshon di Liga Pabou despues di selebrá e kampionato djis ta bolbe kuminsá trein pa bai representá Kòrsou i Karibe durante Little League World Series 2019 na Williamsport, New Jersey. E kampionato mundial aki ta kuminsá dia 15 di ougùstus. Porsierto ku Liga Pabou ta kuminsá e kompetensia riba e mesun dia’ki kontra dje representante di Australia. E final dje kampionato ta 25 di ougùstus.
Liga Pabou pa Williamsport
